الأهالي اتصلوا بالمستشفى وخدوها.. جار صاحبة تريند فتاة الفستان الأبيض يكشف آخر تطورات حالتها
تصدر فيديو لـ فتاة من مدينة الزقازيق بمحافظة الشرقية، تريند مواقع التواصل الاجتماعي خلال الساعات الماضية، إذ ظهرت فتاة تُدعى ابتسام أمام أحد محلات فساتين الزفاف في شارع الغشام، وهي تردد أغنية هو إحنا بعدنا ليه لـ الفنان محمد حماقي، بنبرة صوت حزينة تحمل الضعف والانكسار، مما أثار حالة تعاطف واسعة بين مستخدمي السوشيال ميديا.
وقال محمد أحمد أحد جيران الفتاة في تصريحات خاصة لـ القاهرة 24: ابتسام جارتي وساكنة في آخر الشارع بتاعنا، إمبارح الأهالي عندنا كلموا مستشفى الأحرار في الزقازيق، وكانت حالتها وحشة جدًا وممرضين من المستشفى وصلوا عند بيتها وخدوها للمستشفى.
جار صاحبة تريند الفستان الأبيض يكشف تطورات حالتها
وأضاف محمد: أهل ابتسام دلوقتي حالتهم أحسن، ومش حاسين بأي توتر أو حاجة لأنهم مكنوش عارفين يسيطروا عليها، بسبب الصدمة اللي هي فيها وحالتها النفسية، عائلتها فيها أب وأم وأخوات ومكنتش عايشه في الشارع زي ما الناس بتقول على السوشيال ميديا، لا خالص.
وتابع: السبب اللي وصلها للمرحلة دي، أنها يوم فرحها من 9 شهور خطيبها مات بسبب طلق ناري عن طريق الخطأ، عشان خاطر الناس عندنا في الزقازيق، الناس بتحيي العرسان بضرب النار، فهو خد رصاصة بشكل خاطئ ومات الله يرحمه، وللأسف بقالها كده فترة كبيرة ربنا يخفف عنها ويصبرها يا رب.
