بعد إحالته للمحاكمة.. ننشر الاعترافات الكاملة للمتهم بإنهاء حياة الشاب محمد صوان بالمرج
أحالت جهات التحقيقات المختصة بالقاهرة، المتهم بإنهاء حياة صديقه محمد صوان بعيار ناري من فرد خرطوش، بمنطقة المرج إلى محكمة الجنايات.
ننشر الاعترافات الكاملة للمتهم بإنهاء حياة الشاب محمد صوان بالمرج
واستدعى رجال التحقيق المتهم بقتل محمد صوان شاب المرج، لجلسة تحقيق عقب القبض عليه، بعد مواجهته بالجثمان، لإنكاره معرفة مكان تواجد صديقه، طيلة فترة تغيبه وجاءت أقواله كالتالي:
اللي حصل إنه بتاريخ 18 أغسطس حوالي الساعة 11 صباحا، كنت في البيت ولقيت المجني عليه محمد صوان، معدي من تحت وبيقولي هتعمل إيه هتنزل القهوة قولتوا لا قالي طيب استنى أنا طالعلك، بعد لما طلع وقفلنا باب الشقة روحت قولتلوا أنت مش هتاخد السلاح الخرطوش بتاعك ده؟ قالي لا خليه عندك شوية قولتوا طيب ما تعلمني إزاي أضرب بيه وكده روحت جبت السلاح والطلقة من تحت السرير بتاعي وكنًا واقفين بره في الصالة وبعد كده ادتهولوا وقولتلوا علمني إزاي أحط الطلقة في السلاح وأضرب بيه.
وأضاف المتهم: وأنا بجرب السلاح راحت الطلقة طلعه من الماسورة دخلت في قلبه، وحاولت أشوف أي حاجة أوقف بيها الدم بس هو كان خلاص مات، وقعدت أفكر هعمل إيه في الحوار ده رحت سحبته ودخلته الأوضة الثانية وقفلت عليه باب الأوضة، وأبويا فتح باب الشقة بالمفتاح راح شاف جثة محمد صوان في الصالة وقالي إيه ده فحكتله اللي حصل راح قعد يخبط على راسه ومش عارف يعمل إيه.
كما جاء في اعترافات قاتل شاب المرج: ورحنا جبنا المشمع الأزرق من الأوضة جوه ولفيناه جوه المشمع وجبت لزق وقعدت الزق المشمع عشان ميفكش وبعد كده رحت أنا وأبويا عند الشقة اللي في الدور الأرضي ودخلناه وحطيناه بره في الصالة وأبويا طلع جاب الكوريك عشان نحفر في المطبخ وندفنه.
وأكمل المتهم: بعد كده بدأنا الحفر في المطبخ وبعدين حاطينا الجثة جوة المشمع الأبيض ولفيته بحبل أسود من النص عشان أعرف أسحبه وبعد كده سحبته ونزلتوا في الحفرة وبدأت اردم عليه وعلى حوالي الساعة 12:00 مساءً خلصت ردم على الجثة وطلعت البيت.
وأكد المتهم في اعترافاته أمام جهات التحقيقات أن رجال المباحث بعد إلقاء القبض عليه ذهبوا إلى منزل الضحية عقب استجوابه حول اختفاء المجني عليه، قائلا: وبعد كده دخلنا شارع البيت عندي والضابط نزل من العربية وقال فين مصطفى قولتوا أنا راح مركبني معاه وهما طلعوا البيت عندي قعدوا يدوروا في البيت لمدة ساعتين وبعد كدة روحنا بيت مصطفى أبو محمد وفضلوا يدوروا على أي حاجة تخص محمد وبعد كده رجعنا على شارع البيت بتاعي.
وأوضح المتهم بإنهاء حياة محمد صوان بالمرج أن الجهات الأمنية ألقت القبض عليه ووالده وجرى اقتيادهما إلى قسم الشرطة، قائلًا: الضابط طلع العمارة وقعد يدور فيها وبعد كده أخد أبويا ركبه معاه العربية وبعد كده طلعنا على القسم أنا وأبويا وفي القسم طلعت المباحث وبعد كده قالولي أنت آخر مرة شوفت المجني عليه أمتى؟ وقولتلهم نفس الكلام.
وأشار المتهم إلى أن رجال المباحث واجهوه ببقعة الدم والحفر بمكان دفن الجثة، ولم يجد سبيلًا سوى الاعتراف بجريمته، قائلا: وبعد كده قعد يقولي أيه بقعة الدم اللي على السجادة عندك قولتوا معرفش عنها حاجة راح وراني صورة المطبخ وأن هما مكسرين حته منه روحت قولت خلاص كده وحكيتله على اللي حصل كله.
