كهربا: كنت ماشي كويس لحد لما كولر جاب موديست.. والمدرب مش شايفني وأنا أصلا عاطفي
كشف محمود عبد المنعم كهربا، لاعب فريق الكرة الأول بالنادي الأهلي، أسباب ابتعاده عن المشاركة في الفترة الأخيرة، بجانب حقيقة وجود مشاكل بينه وبين مارسيل كولر المدير الفني للقلعة الحمراء.
تصريحات محمود كهربا
وقال كهربا في تصريحات تليفزيونية: كنت ماشي كويس لحد ما كولر جاب موديست، وتألقي كان توفيق من عند ربنا واستمراريتي في المباريات ومساعدة زملائي هي التي ساعدتي.
وأوضح: كنت ماشي كويس لحد ما جه موديست وبدأ كولر يلاعبه ويفضله عليا، ونفسيتي أهم حاجة عندي وأنا عاطفي، والتعامل النفسي مهم جدًا وبيفرق معايا، وبدأت أبعد عن المشاركة بدون سبب رغم إني بتمرن كويس.
وتابع: كنت بساعد موديست وكنت قريب منه لكني كنت شايف نفسي أنا أحسن، وكنت بتمرن كويس والمباريات هي اللي بتخليني كويس مش التدريبات، وتواجد موديست “همدني” وكان موضوع صعب للغاية وكانت فرصتي أحسن إني ألعب وأساعد زملائي ولكنها كانت وجهة نظر كولر وأنا مقدرش أتكلم لأن كولر ساعدني كتير.
وأكد: ابتعادي عن المشاركة وقت قدوم موديست أثر على نفسيتي وبدأت المشكلات لأني شخص عاطفي، ونفسيا لو أنا مش أحسن حاجة ممكن أتعرض للإصابة، ولما قعدت مع كولر كان بيقولي اتمرن كويس عشان تلعب ودا كلام أنا مكنتش مقتنع بيه وكلامه معايا مأقنعنيش.
وأردف: ببقى زعلان من عدم المشاركة لكن انتصارات الأهلي تسعدني للغاية، وكان نفسي ألعب واحنا كسبانين فرق سكور مثلا ربع ساعة أو 10 دقايق لكن كولر مش شايفني.
وتابع: كولر ساعدني كتير وأنا ساعدته كتير، وكل لما أدخل له أقوله أنا بحب التعامل النفسي كل ما متلاعبنيش تعالى اتكلم معايا نفسيا والعلاقة توترت للغاية بيننا، ولكن مفيش مشاكل بيني وبين كولر.
واستطرد: مفيش مدرب يطلع يقول على الملأ كهربا عندي رقم 3 في الترتيب وهو كان قالي كدة بيني وبينه، عشان كدة أنا زعلت إن هو طلع قال كده قدام الرأي العام كله.
وبخصوص موقف فرح شقيقته، أفاد كهربا: لو اتكرر الموقف تاني هعمله، وأبويا وأمي وأختي دول بس اللي أعمل أي حاجة عشانهم ودا كان فرح أختي الوحيدة وأجلنا الفرح كذا مرة، وكان عندنا 2 مهاجمين يعني دخلت القائمة أو لأ فمفيش مشاكل، ولكن اللي ملوش خير في أهله ملوش خير في حد.
وشدّد: قعدت مع كولر قولتله دي أختي الوحيدة ومستنية الفرحة دي بقالها سنين، وشايلاني، وكولر قالي أفكر في الموضوع بس قالي هتبقا رقم 3 معايا، فـ قولتله ماشي.
واختتم كهربا تصريحاته: الكل عارف النادي الأهلي بالنسبالي اي؟ عمرهم ما يقولولي حرف ومنفذوش وعمري ما أهرب من مباراة، وتحدثت مع خالد بيبو مدير الكرة وقتها الذي تحدث مع كولر وظبّط الدنيا معاه.
