شوبير تعليقا على بيان اعتذار كهربا: عايزين جنازة تشبعوا فيها لطم
علق الإعلامي أحمد شوبير، على بيان محمود كهربا لاعب الفريق الأول لكرة القدم بالنادي الأهلي للجماهير، بعد أحداث مباراة شباب بلوزداد في دوري أبطال إفريقيا.
تعليق قوي من شوبير على بيان كهربا
قال شوبير في تصريحات إذاعية: كهربا عمل بيان اعتذار للجماهير ممتاز، وحد كتبه ليه باحترافية شديدة وقال إني تعرضت لحملات ممنهجة والسباب لي ولأهلي بألفاظ لا يتحملها أحد وبعتذر عن أي سوء تفاهم.
وتابع: البعض استقبل الاعتذار بود وحب وقالوا عفا الله عما سلف، والبعض الأخر قال لا مينفعش ولازم نشوف الأسباب، وناس تانية زادت من السخرية وبتدي فين يوجعك.
وواصل شوبير تصريحاته: هو في إية يا جماعة؟، الولد يمشي كويس مش عاجب ويتهز شوية مش عاجب، ويغلط ويعتذر بردو مش عاجب، في ناس قاعدة عايزة جنازة وتشبع فيها لطم.
واختتم شوبير تصريحاته: الراجل بيعتذر وفيه اللي نصحه وقدم له خريطة المرحلة المقبلة، إنما موضوع طول الوقت بنصب نفسنا قضاة ودا أمر غير مقبول ولا مرغوب، والأمر حاليًا في يد كهربا للرد على الحميع من خلال الملعب.
اعتذار كهربا لجماهير الأهلي
وكان كهربا وجه رسالة إلى جماهير الأهلي، حيث كتب عبر حسابه على إنستجرام: الجمهور هو متعة الكرة وأهم عناصرها وجمهور الأهلي أكبر داعم ليا وعلاقتي بجمهور الأهلي كبيرة وليهم رصيد يكفي ويوفي.
وتابع: وانا تعرضت لحملات ممنهجة والسباب لي ولأهلي بألفاظ محدش يقبلها علي نفسه او علي اهله في رسائل بعد تسريب رقمي من ناس عايزة تدمر مستقبلي الكروي ومفيش لاعب كرة عايز يخسر فريقه أو يكون وحش.
واختتم محمود كهربا: جمهور الأهلي طول عمره هو اللاعب رقم واحد وصاحب فضل عليا بعد ربنا، ربنا يجعلكم دايما سند وضهر ليا وبعتذر عن أي سوء تفاهم او سوء تعبير.
