إياد نصار: دخولي الدراما المصرية كان طموحًا.. وفشلت في زواجي الأول وحبيت وعي في الثاني
تحدث الفنان إياد نصار، عن بداية دخوله ومشاركته في الدراما المصرية، قائلًا: كان طموحي إني أدخل سوق الدراما في مصر، لأن المنافسة عالية جدًا، والكل كان متوقع أني أرجع بلدي بعد سنة أو اتنين، ولكني كنت حاسس إن ربنا راسم لي حاجة هنا وإن فيه مجهود لازم أعمله.
وأضاف إياد نصار، في تصريحات إذاعية: لسه بتعلم وبراقب لغاية دلوقتي، أنا مراتي مصرية يعني دخلت البيت المصري وبقى عندي تفاصيل وتنويع بصري أكتر، ولسه فيه مناطق في الشغل مدخلتش عليها ولو دخلت عليها بيكون غرور مش ثقة، لأن خبرتي في الحياة في مصر لسه مش كبيرة.
إياد نصار: ترددت سنين قبل زواجي بعد فشل تجربة الزواج الأولى
كما كشف إياد نصار، تفاصيل انفصاله عن زوجته الأولى، قائلا: جوازي الأولاني كان حب جامعة وفشلت فيه مع أننا أصدقاء وفيه بينا أبناء، وبحمل نفسي جزء من المسئولية باللي حصل أكيد مش هحمل الطرف التاني المسئولية كاملة، وقعدت سنين متردد في أني ارتبط تاني ولكني حبيت المرة دي بوعي، ويهمني أني أعرف أتكلم مع الطرف اللي قدامي وأعرف أقول لها كل أسراري، ومفيش بني آدم ولا أمي شافني بالطريقة اللي أنا بيها قدام مراتي شيماء، أنا قدامها أقرب شخص ليا.
وواصل: أنا بقول لها كل حاجة حلو أو وحش، وبقول عيبي وبغيره، مراتي بتستحملني في حاجات كتير، إحنا بنعرف نسمع بعض ومتطلباتنا مش سطحية من بعض ومعتقدش أنها هتتغير، وكبرنا كفاية أننا نثبت قوانينا.
