بقوله رد عليا أخويا حالته إيه قالي اطلع بره.. اعترافات محمد فؤاد متهمًا في قضية طبيب عين شمس| خاص
يستكمل القاهرة 24 في الجزء الثاني نشر التحقيقات في قضية اتهام الفنان محمد فؤاد بالتعدي على الدكتور مصطفى أيمن طبيب مستشفى عين شمس التخصصي، ونشوب مشادة كلامية بينهما، تطورت لمشاجرة تعدى كل طرف منهما على الآخر.
نص تحقيقات محمد فؤاد في واقعة مشاجرة عين شمس
وجاءت أقوال الفنان محمد فؤاد في الجزء الثاني من اعترافاته في التحقيقات كالآتي:
س: هل استجاب الطبيب مصطفى أيمن لتساؤلك حول حالة شقيقك؟
ج: لا هو مشرحليش أي حاجة خالص عن حالة أخويا وهو أصلا كان رافض يبصلي.
س: ما سبب ذلك؟
ج: أنا حسيت إن هو متضايق من حاجة بس أنا مش عارف إيه هي.
س: كم عدد المرات التي خاطبت فيها الطبيب مصطفى أيمن عن حالة شقيقك؟
ج: أربع مرات.
س: هل رد الطبيب مصطفى أيمن عن تساؤلاتك عن حالة شقيق في كل مرة؟
ج: لا في الأربع مرات هو مردش عليا في ولا مرة فيهم.
س: ما التصرف الذي بدر منك حيال ذلك؟
ج: أنا قولتله شكلهم مصحيينك من النوم علشان كانت الساعة 4 الفجر.
س: ما التصرف الذي بدر من الطبيب مصطفى أيمن حيال ذلك؟
ج: أجاب محمد فؤاد: هو ساعتها رمى الورق والقلم على الأكاونتر اللي قدامه وبعلو صوته قال هات الأمن يطلع ده بره.
س: هل تعدى الطبيب مصطفى أيمن عليك؟
ج: أيوه.
س: صف لنا ذلك التعدي على وجه التحديد؟
ج: أجاب الفنان محمد فؤاد وقال: هو تعدى عليا لفظيًا وقالي انت فاكر نفسك مين انت ملكش لازمة، والوقت ده أدخل الأمن وحاول يحجز بينا وبين الطبيب وفي ذات الوقت هو حاول يضربني برجله، لكن أنا تفاديتها ومجتش فيا، وهو اتعدى عليا ماديا لما أنا في آخر الواقعة كنت عايز أصور الواقعة عشان أعرف مين الدكتور ده بعد كده، وهو خطف التليفون بتاعي مني بالقوة ورجع بيه ورا في الغرفة، فأنا دخلت عليه عشان أخد التليفون بتاعي لقيت الأمن بتاع المستشفى خد التليفون من ايده وادهوني وأخدنا عبد العزيز أخويا ومشينا.
س: ما قولك فيما جاء بأقوال الطبيب مصطفى أيمن بتحقيقات النيابة العامة والثابت بما تعديك لفظيًا عليه بأن سببته قائلًا يلعن… وكذا يلعن… انت مش عارف انا مين ده انا هحبسك يابن…؟
ج: محصلش.
س: ما قولك فيما جاء بأقوال الطبيب مصطفى أيمن بتحقيقات النيابة العامة والثابت بما يفيد ركلك بقدمك له بقدمه؟
ج: محصلش والكاميرات اللي صورت الواقعة تثبت كده، ده هو اللي حاول يضربني برجله وأنا اتفاديتها.
