شهيرة: اللي بيشتموا الفنانين مرضى.. ولما إحنا شياطين بيجروا ورانا ليه علشان يتصوروا؟
علقت الفنانة شهيرة، على الجدل المثار حول ما كان يجب أن يحمل العمل الفني رسالة أم لا؟ بجانب الحديث عن تدخل الجمهور في الحياة الشخصية للفنان والربط بين أعماله الفنية ومعتقداته الدينية.
وقالت شهيرة، في تصريحاتها لـ القاهرة 24: مش ضروري أن يقدم العمل رسالة، ولكن لازم الجمهور يستفيد من العمل حتى لو كان عمل كوميدي، أحيانًا الفنان بيقدم أعمال بغرض الترفيه وده في حد ذاته رسالة، الإحساس بالبهجة والفرح والخروج من الضغط النفسي رسالة.
شهيرة: الفن له دور كبير في حياة البشر
وأردفت شهيرة: الفن له دور كبير في حياة البشر، ولكن في ناس بتحاول تقلل من شأن الفن ولكن دول بيضحوا على نفسهم، مفيش حد يقدر يعيش من غير فن، هو في حد يقدر ميشفش التليفزيون ولا يسمع راديو أو مزيكا؟، أو يشوف عمل ترفيهي يخرجه من ضغوط الحياة؟.
وأضافت: في ناس بتقول انشغل بالقرآن والعبادات، ولكن مفيش منطق بيقول كده، القرآن والعبادات لهم وقتهم، والترفيه له وقت، علي بن أبي طالب قال روحوا عن القلوب ساعة فساعة، فإنها إذا كلت عميت، لازم نرفه عن القلوب.
أما عن تدخل الجمهور في الحياة الخاصة للفنان، فعللت شهيرة قائلة: الموضوع ده محتاج دراسة نفسية، الجمهور بيتدخل في حياة الفنان على أي أساس؟ الجمهور ممكن يقول رأيه في العمل اللي الفنان بيقدمه ولكن مياخدش دور الناقد الفني خاصة أنهم مش متخصصين، لكن التدخل في الحياة الشخصية للفنان وإلزامه بـ إظهار تفاصيل حياته مش مقبول.
وواصلت: الفنان إنسان وله حياته الخاصة ومحارمه، الفنان مش سلعة، الناس اللي بتنتقد دي محتاجة تتعالج، لو أنتم شايفين الفنانين شياطين، ليه لما بيشوفونا في مول ولا أي مكان بيجروا ورانا علشان يتصوروا؟ أو يشفونا في العربيات يشاوروا ويحاولوا يتكلموا معانا؟، أنا مش فاهمة التناقض ده بصراحة، مينفعش يهينوا الفنان بأي شكل من الأشكال، دول مرضى نفسيين.
