نادية الجندي: حب الناس سر شبابي.. وقدمت كل النجوم بدايةً من أحمد زكي
تحدثت الفنانة نادية الجندي عن سر شبابها، وسبب ابتعادها عن الساحة الفنية خلال السنوات الأخيرة، بجانب حديثها عن تكريم الفنانة منى زكي، في الدورة الرابعة من مهرجان البحر الأحمر السينمائي الدولي، الذي انطلق افتتاحه منذ قليل، في مدينة جدة بالمملكة العربية السعودية.
وقالت نادية الجندي، في لقائها مع الإعلامية بوسي شلبي، على هامش افتتاح مهرجان البحر الأحمر السينمائي: حب الناس أهم حاجة بالنسبة ليا وهو إكسير الحياة والشباب، الحمد لله إن ربنا قدرني أني أقدر أسعد الناس على مدى مشواري الفني، والحمد لله إن رصيدي وتاريخي لغاية النهاردة بحب الناس، ودا بيديني دفعة قوية جدًا ولقيت نتيجة ده وصداه عند الناس.
وتابعت نادية الجندي: مستوى أعمالي كان فيه إبهار، دلوقتي التقنيات والتكنولوجيا تطورت أوي وبقى في إبهار، والمواضيع اللي أنا بحبها في فيها رسائل بتتعمل بالشكل اللي فيه إبهار وتكنولوجيا بالشكل ده هيبقى شيء جميل ويسعدني.
وعن سبب ابتعادها عن الساحة الفنية، فعلقت نادية الجندي: أنا مش كسلانة ولكن أنا بيتعرض عليا حاجات كتير ولكن الإمكانيات مش هي، والمواضيع بقت قليلة والكُتاب، أنا طبعًا خلية نحل مبقدرش أقعد من غير شغل، ولكني لازم ألاقي العمل القوي اللي يخليني أرجع لجمهوري.
نادية الجندي: منى زكي ملتزمة وبتحب فنها
كما علقت الفنانة نادية الجندي، على تكريم الفنانة منى زكي، بمهرجان البحر الأحمر السينمائي، قائلة: منى زكي بحبها جدًا لأنها جادة وملتزمة وبتحب فنها، والفنان بيقيم الفنان الحقيقي الملتزم، وهي من النوع المجتهد وأنا بحب فيها الحماس ده، وأنا قدمت معظم نجوم السينما المصرية وعندي حس فني أني ألقط الموهبة الكويسة الحقيقية، والحمد لله ده كله ثراء للصناعة ولازم نشجع النجوم، وده بداية من أحمد زكي وكل النجوم تقريبًا بدايتهم كانت معايا، وهما كانوا يستحقوا.
