شجاع بأجر
من المهن اللي انتشرت في الفترة الأخيرة في الولايات المتحدة الأمريكية وبعض دول أوروبا وتحديدًا في آخر 5 شهور وسيرتها عاملة قلبان بره ما بين مؤيد ورافض هي مهنة الشجاع بأجر.
يعني إيه الشجاع بأجر؟ نفترض إن حضرتك موظف في شركة ما وبتعاني من تضييق وغلاسة مديرك معاك بشكل مستمر ومهما عملت وأنجزت برضه مش بيعجبه العجب وفي نفس الوقت مش عايز أو على وجه الدقة مش قادر ترد عليه أو تفقد أعصابك عشان ما تفقدش بعدها وظيفتك فبتضطر تبلع الزلط للمدير عشان ليلتك تعدي وتسمع الكلمتين وتسكت.
الفكرة إن مهما كانت درجة صبرك سنة أو سنتين أو حتى 5 سنين هتوصل في النهاية لمرحلة إنك هتجيب آخرك ويا إما تقدم استقالتك يا إما تضرب مديرك اللي مسود عليك عيشتك، بس طلع حل جديد! الشجاع بأجر ده شخص حضرتك بتديله فلوس وبيروح لمقر الشركة بتاعتك وبيشتم مديرك بأقذر الألفاظ اللي في الدنيا قدام كل الموظفين ويسيبه ويمشي! لحظة وهو هيقدر يدخل المكان إزاى؟
الشجاع بأجر دايمًا ومن مقومات وظيفته إنه بيكون شخص شيك جدًا لابس هدوم غالية ونازل من عربية حديثة وبيدخل أي شركة بسهولة على اعتبار إنه عميل جديد أو زبون أو حتى جاي يعمل إعلان، هو بيتصرف وبيختار الصياغة الأنسب اللي هيقدر يدخل بيها لمقر الشركة واللي غالبًا بتكون صياغة مناسبة للموقف ولما تضيف عليها كمان شياكته فمسألة وصوله لمكتب المدير بتبقى مسألة وقت مش أكتر.
المهم بيدخل الأخ الشجاع بأجر اللي واخد منك قرشين حلوين على الشركة بتاعتك ويسأل عن المدير ويقابله المدير وفي لحظة معينة كده بيقف الشجاع بأجر ويتعمد إن صوته يكون عالي ويختلق أي مشكلة من أي نوع مع المدير ده ويروح شاتمه، يعني مثلًا يقول له: أنت إنسان جبان وحرامي وقذر ومكانك المفروض يكون في السجن، أنت طلعت زي ما كانوا بيقولوا عنك فعلًا إنسان متحرش وحقير، أنا مش عارف إزاي الموظفين بتوعك دول مستحلمين واحد زبالة زيك؟! كلام كله إهانة ومهانة وبيخرج من صاحبنا بمنتهى السرعة والعنف اللي بيكونوا كفيلين يعملوا فضيحة للمدير ويهزأوه قدام كل الموظفين وطبعًا قدام أخينا الموظف اللي عامل الحوار ده كله بفلوس زى ما قولنا.
طب هو الموظف استفاد إيه؟ حاجتين: أولًا جاب جزء من حقه لما شاف مديره بيتمرمط بيه الأرض قدام الموظفين زي ما كان بيحصل مع الموظف نفسه من المدير، ثانيًا هيخلي المدير يفكر مليون مرة بعد كده قبل ما يرمي بلاه عليه ويعرف بشكل أو بآخر إن الله حق وإنك زي ما بتعمل زي ما هيتعمل فيك.
الموضوع يبان طفولي أوي بس للأسف انتشر في أمريكا وفي بعض دول أوروبا واستخدمه ناس كتير بالشكل اللي يأكد إن المسألة كانت ضرورية وبيعاني منها ناس كتير بثقافات كتير، لكن من المتوقع إن ومع الشهرة اللي اخدها الموضوع ومع زيادة انتباه المديرين بعد كده للحركة دي مش كتير منهم هيقعوا فيها والأمر هيفقد زهوته اللي ابتدى بيها وهيكون مالوش قيمة وهترجع ريما لعادتها القديمة، ولو أنت كموظف وافقت إن كرامتك أو سمعتك أو كفاءتك الوظيفية يتقل منهم لأي سبب، سواء عجرفة المدير أو تسلطه أو رغبته في إنه يطفيك تبقى تستحق اللي هيحصل معاك، ومهما جبت مليون شجاع بأجر عشان ياخدلك حقك برضه مش هيقدروا، الموضوع لازم يبتدي منك.. محدش بيشتري شجاعة.
الموقف اللي عايز منك شجاعة قرار مش هينتهي غير لما شجاعتك تظهر في الصورة وتاخد القرار، التسويف مش بيحل، الاستسلام مش بيجيب حق، قبولك للإهانة محدش هيشيل توابعه غيرك، في نفس الوقت مينفعش تشتري شجاعة حد، ولا إنك تنتظر حد يشيل شيلتك، كل واحد فينا في مرحلة معينة من حياته مش بيكون محتاج أكتر من خطوة يثبت بيها لنفسه قبل لغيره إنه عايز يكون أفضل، فيه نصيحة عظيمة بتقول: إما أن تتغير أو سيتكرر نفس اليوم إلى الأبد.
