اعترافات المتهم الثاني بقتل الممرض مينا موسى: ساعدت في خطفه عشان ألف جنيه ومعرفش إنها هتوصل للقتل | خاص
حصل القاهرة 24 على نص التحقيقات في قضية مقتل مينا موسى ممرض المنيا، عقب استدراجه من محافظة المنيا مسقط رأسه إلى محافظة القاهرة وتحديدًا بمنطقة الزاوية الحمراء، من أحد الأشخاص بحجة وجود فرصة عمل، وما إن وصل حتى احتجزه المتهم بمعاونة آخر لمساومة أسرته على مبلغ مالي، وحال مقاومته للأول تعدى عليه حتى الموت وقطع جثته وألقى بها في ترعة الإسماعيلية.
قضية قتل مينا موسى ممرض المنيا
واستمعت جهات التحقيق للمتهم الثاني بقتل مينا مرسى ممرض المنيا، وجاءت أقواله كالآتي: اسمي مصطفی م، وشغال طاهي واللي حصل إن إبراهيم ر، قريبي من ناحية الأب وكنت مستلف منه فلوس عشان أنا في زانقة وإداني 5000 جنيه، وبعدين كان بيحاول يوصلي بقاله فترة بس أنا ماكنتش برد عليه، ومن حوالي 20 يوم جالي الشغل وكان هيعملي مشاكل فأنا كلمته ولاقيته بيقولي أنت مش بترد ليه؟، قولتله إني مش معايا فلوس لما أدبر فلوس هبعتهالك قالي خلاص أنا عايزك في مصلحة قولتله إيه هي قالي في واحدة ناصبة على واحد في فلوس، فأنا هجيب أخوها وأوديه للناس اللي ناصبين عليهم وهما يتصرفوا معاه وأنت مش هتعمل حاجة أنت هتقف بس معايا عشان يخاف وخلاص وقالي مش هاخد الفلوس اللي ليا عندك ولما الناس تديني الفلوس هديك 1000 جنيه كمان.
وأضاف المتهم الثاني في التحقيقات: أنا كنت محتاج الفلوس عشان عليا قرض ومش عارف أسدده، قولتله ماشي أجيلك امتى قالي تعالى يوم السبت بالليل عشان هو جاي الصبح لما قولتله هو هيجي إزاي قالي أنا هجيبه بطريقتي، رحت نمت مع إبراهيم في البيت قبلها بيوم وثاني يوم الصبح أنا فضلت في البيت وإبراهيم نزل يجيب مينا موسى، ولما طلع البيت دخله على الأوضة اللي على يمين الباب وأول ما دخل سلم عليا وقلتله يقعد في الأرض فاقعد على طول وإبراهيم بدأ يربطه، مينا بيقول في إيه هنا، قالي إنتوا فاهمين غلط وأنا أختي لسه يا جدعان هو أنا مش جاي شغل ما أنا قولتله أنت أختك ناصبه على عروسة جديدة وما نصبتش على حد.
وتابع المتهم بقتل مينا موسى: بصيت لإبراهيم قولتله إيه الحوار قالي ملكش دعوة أنت وأخد من مينا 550 جنيه من جيبه وادهالي وقالي امشي أنت والناس هتيجي تاخده، مشيت وروحت على الشغل، كلمت إبراهيم ثاني يوم بقوله عملت ايه قالي الناس جم أخدوا مينا في نفس اليوم وقالولي لما أخته ترجع الفلوس هيدوني فلوسي وأديك 1000 جنيه بتاعتك وسألته على مينا قالي إنه كويس بس الناس أخدته وبعدين قالي ماترنش عليا تاني وقفل معايا وثاني يوم كنت في الشغل لاقيت المباحث جات أخدوني على القسم وقالولي إنت تعرف إبراهيم قلتلهم أه قالولي إحنا عرفنا كل حاجة فحكيت ليهم كل اللي حصل بس ماكنتش عارف إنه انقتل وده كل اللي حصل.
