لبلبة: عادل إمام عرض عليا يحاسب مستشفى والدتي.. ومندمتش على عدم الإنجاب
تحدثت الفنانة لبلبة، عن عدة موضوعات شخصية بحياتها، مشيرة إلى أنها تزوجت وهي تبلغ من العمر 17 سنة وظلت 3 سنوات حتى تتخطى وفاة والدتها.
وقالت لبلبة خلال لقائها ببرنامج AB talks: فقدت والدي وطلعت تاني يوم غنيت وضحّكت الناس ورجعت أعيط تاني، ووفاة والدتي كانت صدمة حياتي وقلعت الأسود بناء على رغبة جمهوري، ولو كان عندي بنت مكنتش هخليها تدخل نفس مجالي.
وتابعت لبلبة: اتجوزت وأنا 17 سنة واتطلقت بعد 7 سنين، ولو كنت اتجوزت تاني كنت هخلف على الأقل 3 لكن شغلي في الفن كان عقبة.. واللي كان بيدخل حياتي كان بيكون تحت الأضواء ومش أي حد يحب ده، وأنا مش بعرف أندم ومش ندمانة على عدم زواجي مرة تانية، ولما بلاقي نفسي لوحدي بقول يا سلام لو كان معايا ولد حواليا، بس بقول يمكن لو كان عندي ولاد كانوا سابوني وراحوا سافروا برا وسابوني.
لبلبة: عادل إمام عرض عليا يحاسب مستشفى والدتي
وأضافت لبلبة راوية موقف جمعها بالفنان عادل إمام: عادل إمام كلمني وقت مرض والدتي وقالي عايزة كام عشان تحاسبي المستشفى، وكان بيقعد جنبي وقت وفاة والدتي يقولي لازم تاكلي عشان خسيتي وشكلك بقى وحش.
وعن أكثر موقف محرج تعرضت له لبلبة، قالت: كنت في مرة بستلم جايزة وطلعت على المسرح ولقيت سوستة الفستان بتتقطع، حد من لجنة التحكيم طلع بسرعة يديني الجاكيت بتاعه عشان ينقذ الموقف.
واختتمت لبلبة حديثها قائلة: مفتقدة أمي والوقت مش بينسيني وبحس كأني دفنت أمي امبارح وحاليا بمر بأصعب مراحل الافتقاد ليها وبتخيل إن هي معايا طول الوقت وبفتكر رأيها في السيناريوهات اللي بتتعرض عليا.
