عامل النظافة المتهم باستدراج صغيرة لمحاولة الاعتداء عليها بالإسكندرية: بوستها بس| تحقيقات
كشفت التحقيقات في واقعة اعتداء عامل نظافة في مستشفى بالإسكندرية على طالبة بالصف السادس الابتدائي بعد استدراجها خلال خروجها من الدرس الخاص بها في منطقة خورشيد بعزبة زغلول، وتهديدها بالإيذاء حال عدم الذهاب معه إلى منطقة مجهولة لمحاولة التعدي عليها.
عامل النظافة المتهم باستدراج طفلة لمحاولة التعدي عليها: كانت بتعيط وقلتلها متخافيش
وبسؤال جهات التحقيق عامل النظافة المتهم باستدراج صغيرة خلال خروجها من الدرس الخاص بها في منطقة خورشيد بعزبة زغلول وتهديدها بالإيذاء عن أقواله فيما هو منسوب إليه من الشروع في خطف الطفلة المجني عليها د.م وهي لم تبلغ من العمر ثماني عشر عامًا وضبطه بالجريمة متلبسًا من قبل الأهالي وذلك بأن اقترن الشروع في الخطف بجناية هتك عرض المجني عليها بأن لامس مناطق عفتها، أنكر المتهم ذلك قائلا: محصلش.
وأمام جهات التحقيق قال المتهم: اللي حصل أن بتاريخ 2024/11/1 كنت رايح الرحمة بعد الزوايدة علشان أشوف جدتي ولقيت البنت دي ماشية وحاطيت أيدي على كتفها وقولت لها هديلك بوسة وهسيبك هزتلي دماغها بالموافقة، وبعدها لقيت عامل نظافة في الشارع وشخصين كمان مسكوني وضربوني وبعدها أخدوني على نقطة الشرطة وعرضوني على جهات التحقيق.
وأضاف المتهم: كنت رايح أزور جدتي في الزوايدة ولقيت البنت دي قدامي وكانت ماشية ومعاها شنطة كأنها خارجة من الدرس وأول مرة أشوفها ومفيش بيني وبينها أي خلافات، وأنا حطيت أيدي على بوقها بس علشان كانت بتعيط وأنا قولتلها متعيطيش أنا هخليكي تروحي وأول ما مسكتها حطيت أيدي على كتفها وبعد كدة عيطت فحطيت أيدي على بقها وقولتلها متعيطيش أنا هخليكي تروحي وقولتلها هديكي بوسة وتروحي فهزت رأسها بالموافقة.
ومن جانبها قالت الطالبة التي تبلغ من العمر 10 سنوات أمام جهات التحقيق بالمنتزه بشأن القضية التي حملت رقم 9583 لسنة 2024: اللي حصل أن بتاريخ 2024/11/8 في حوالي الساعة 12:30 بعد الظهر أنا كنت لسه مخلصة درس تكنولوجيا ولقيت واحد ماشي ورايا فأنا ساعتها مديت شوية ولقيته من وريا وساعتها لقيته شدني من الجاكيت بتاعي وحط أيده على بوقي وساعتها أنا عيطت وقالي لو أتكلمتي مش هخليكي تشوفي بابا وماما تاني.
وتابعت الصغيرة في واقعة اعتداء عامل نظافة عليها: ساعتها شوفت عامل نظافة في الشارع وشاورتله علشان يلحقني وهو ساعتها جه وقالوا مين دي والمتهم قاله دي بنت أختي، فقاله لا أنت كذاب وساعتها الراجل ده طلع يجري وعامل النظافة طلع يجري وراه وأنا بعدها جريت وقابلت بنت كبيرة وقولتلها وديني عند أبويا وأنا ساكنة قريب من هنا وهي أخدتني وودتني لبابا وحكيتله على اللي حصل، والراجل ده حاول يخطفني، وقبل ما أقابل عامل النظافة كان بيحط إيده على مناطق حساسة.
واستكملت: ساعتها كنت ماشية مع الراجل ده على الطريق البطيء وعامل النظافة كان ماشي على الطريق السريع من الناحية الشمال والرجل ده كان حاطط إيده على كتفي ولما كنت بعيط كان بيسمح دموعي وساعتها عامل النظافة جه وكلم الراجل، قاله مين دي قاله دي بنت أختي قاله لا أنت كذاب وطلع يجري.
