يسري نصر الله يكشف سبب رفضه أحمد زكي لتقديم بطولة فيلم مرسيدس: قولتله هدهنك أبيض
تحدث المخرج يسري نصر الله عن كواليس طلب الفنان الراحل أحمد زكي، المشاركة في فيلمه الشهير مرسيدس، الذي قدمت بطولته الفنانة يسرا والفنان زكي فطين عبد الوهاب عام 1993.
يسري نصر الله يكشف سبب رفضه أحمد زكي لتقديم بطولة فيلم مرسيدس
وقال يسري نصر الله - خلال ندوة تكريمه بمهرجان القاهرة السينمائي -: أحمد زكي كان عايز يمثل في فيلمي مرسيدس، قولتله أنت جسمانيا مش هتليق على الدور لأن البطل بشرته بيضة فهنعمل إيه.. هندهنك أبيض؟.
واستكمل يسري نصر الله حديثه: أنا مبشبعش، والسنة اللي عملت فيها مرسيدس كان في الكيت كات والإحساس العام بتاع الناس وهي بتتصور على مرسيدس في شيء غريب لأنه متصور في الشارع، واللي بيخليني بحب الأفلام دي هي الحقيقة اللي في القصة.. ولما عملت فيلم أحكي يا شهرزاد وغيره في حاجة في الأفلام دي بتاعتي، والتجارب بالنسبة ليا أني قرأت عن حد وشخصية أو قابلت حد أو المزيكا أو الناس اللي عرفتها، كل ده جزء من تجارب متضيقش فكرة التجربة الشخصية.
وواصل المخرج يسري نصر الله: أنا ابن عائلة مثقفة واتربيت في مدرسة ألماني، ودخلت جامعة القاهرة كان في الحركة الطلابية وحاجة محدودة والإحساس إنك اتربيت في الناحية الصح إن عندي عائلة واستبدلها، ولو بصينا لفيلم مرسيدس هنلاقي إنها تجربة واحد عايز يخرج من الدائرة، مشيرًا إلى أن مسلسل ألف ليلة وليلة من أهم الأعمال التي قدمها في حياته وأثرت في وجدانه بشكل كبير.
وتابع يسري نصر الله: كنت بحب أوي اللوكيشن بتاع يوسف شاهين وتعلمت منه، كان فيه بهجة وكان بيصنع جمال وحاجة حقيقية، عمري ما تعاطفت مع الناس اللي بتقول تعبنا في الفيلم أو المسلسل ده، أنت هتذلني علشان هتشتغل كتير؟.
ويقيم الآن مهرجان القاهرة السينمائي الدولي، ندوة خاصة للمخرج الكبير يسري نصر الله، الحائز على جائزة الهرم الذهبي الفخرية لإنجاز العمر، في دورته الخامسة والأربعين، بدار الأوبرا المصرية ويديرها المخرج تامر عشري، حيث تأتي تكريمًا لمسيرته السينمائية الحافلة.
