مشيرة إسماعيل تشكو من جيرانها: البنات بتشرب سجاير على السلم.. وحاسة إني بقيت ساكنة في حارة
تحدثت الفنانة مشيرة إسماعيل عن أزمتها مع جيرانها، شاكية من سلوكهم ومعربة عن استيائها بسبب محاولاتهم لفتح مشاريع تجارية بالعمارة.
وقالت مشيرة إسماعيل، في تصريح خاص لـ القاهرة 24: الشقتين اللي في الدور الأرضي مشترك فيهم شخصين، عيادة الحيوانات مقفولة بقالها مدة وبيحاول يعمل تصالح وياخد رخصة، والشقة التانية صاحبها فاتح سايبر فيها وفاتحين الشباك على الشارع وعاملين سلم حديد، وأنا عربيتي كانت مركونة رجعت لقيت 3 قاعدين عليها وماسكين كوبايات فيها خمور، قلتلهم أنتم عايزين بطانية لأن كده الدنيا برد عليهم، وهما مكدرين عيشتنا، وكل شوية يفتحوا مشروع ويقفلوه وكان عايز يفتح جيم في الشقة.
مشيرة إسماعيل تشكو من جيرانها بسبب الإزعاج
وأردفت مشيرة إسماعيل: في حقوق جار وحقوق سكان، ينفع يبقى بنات قاعدة على السلم وماسكين الكلاب بتاعتهم وبيشربوا سجاير ومستنين دورهم في العيادة؟ أنا عايشة طول عمري في مصر الجديدة، أصحى مرة واحدة ألاقي نفسي في حواري وفيها كلاب؟ إزاي عايزين يعملوا صالة مزادات في الشقة؟ إحنا فين.
أزمة مشيرة إسماعيل
وفي وقت سابق، استغاثت الفنانة مشيرة إسماعيل، بمجلس الوزارة ومحافظ القاهرة من وجود مستشفى بيطرية للحيوانات بمدخل عمارتها، لافتة إلى أنهم قدموا شكاوى كثيرة دون جدوى، واختصت القاهرة 24 بمجموعة فيديوهات وصور تكشف وجود الكلاب وحجمها الكبير الأمر الذي يسبب خوفا ورعبا لدى السكان الذين منهم كبار سن وأطفال.
