بعد صفع ابنتها من مالكة حضانة في الإسكندرية.. والدة الطفلة كندة: القلم علم على وشها 5 أيام
حالة من الغضب سادت منصات مواقع التواصل الاجتماعي، وذلك بعد تعرض الطفلة كندة في إحدى الحضانات بالإسكندرية للصفع من قبل مديرة الحضانة، وتواصل القاهرة 24 مع والدة الطفلة، وذلك بعد تحريرها محضرا ضد مالكة الحضانة.
القصة الكاملة لصفع طفلة الإسكندرية
وفي تصريحات خاصة لـ القاهرة 24 قالت، إيمي حنفي والدة الطفلة كندة: أنا حررت محضر ضد مديرة الحضانة، اللي اعتدت على بنتي، والنيابة كلمتني وخدوا أقوالي وشافوا بنتي، وأكدولي أنهم هيجيبوا حقها، وأنا لسه ماشية في الإجراءات، وروحت وزارة التضامن الاجتماعي، وقدمت فيها بلاغ، وكلمت حقوق الطفل.
وأضافت والدة الطفلة: أقوال مديرة الحضانة، كانت متضاربة جدًا، في الأول قالت إن الدادة هي اللي ضربت بنتي، وبعد كده قالت إنها عندها حمى بحر متوسط، وفيه واحدة كانت شاهدة على اللي حصل لبنتي بعد ما المديرة ضربتها، والقلم علم على وجه بنتي لمدة 5 أيام، وأنا لما روحت للنيابة، كان القلم لسه ظاهر على وجهها.
وأكملت: بنتي عندها عام و10 أشهر، وأنا كنت مودياها الحضانة عشان تتعلم وتطور وتبدأ تتعلم الكلام، لكن بسبب اللي حصلها على يد مالكة الحضانة، نفسية بنتي اتغيرت، ومبقتش تأكل زي الأول وخست جامد.
