شيرين عبد الوهاب: عايزة بنتي تخترع دواء ومتتعاملش مع بني آدمين مشاكلهم كتير.. ويا رب أفضل حقيقية
تحدثت الفنانة شيرين عبد الوهاب، عن بناتها هنا ومريم، وتعاونها مع ابنتها الصغيرة هنا في أغنية قالك نسيني، والتي طرحتها لجمهورها خلال الفترة الماضية وحققت نجاحًا كبيرًا لدى الجمهور.
وقالت شيرين عبد الوهاب، في لايف عبر حسابها بموقع تيك توك: أغنية قالك نسيني كنت عند توما صاحبي وحبيبي، وعجبتني جدًا وقلت له أنا مسافرة واشتغل في التوزيع، ولما رجعت كانت هنا معايا بالصدفة وكانت مريم عند والدها، وكانت كسلانة وقولتلها لأ فوقي وهتغني معايا، البنت أدت دفا للأغنية.
وأوضحت شيرين عبد الوهاب، أنها ستطرح نسخة جديدة من أغنية قالك نسيني، قائلة: النسخة الجديدة هتنزل على اليوتيوب هنعلي صوت هنا عشان عايزة اسمعه، أنا بحبهم وهما رافعين راسي.
وعن ابنتها مريم، علقت شيرين عبد الوهاب: لو كنت مدرسة كنت هحب شغلي وكنت هفيد التلامذة، وبنتي مريم عايزة تطلع دكتورة قلت لها عايزاكي تخترعي دواء ولكن متتعامليش مع بني آدمين هتتعبي، الناس دلوقتي مشاكلها كتير، أنا بتمنى هي تعلم الناس إزاي تفرح.
شيرين عبد الوهاب: في 10 سنين من حياتي عايزة أنساهم.. وربنا هيجبلي حقي من أي حد زعلني
كما تحدثت الفنانة شيرين عبد الوهاب، عن نجاح أغنيتها بتمنى أنساك، قائلة: أنا كنت خايفة إن الأغاني متعجبش الجمهور وتبقى متلقش بيهم، ولكن أغنية بتمنى أنساك من الأغاني اللي سمعهاني عزيز الشافعي، بتمنى أنساك بتوجعني ولكنها تجربة أي إنسان بيشوف حاجة وحشة في حياته بيتمنى ينساها وأنا شفت كتير أوي، في 10 سنين في حياتي عايزة أنساهم، وربنا هيجبلي حقي من أي حد زعلني.
وتابعت شيرين عبد الوهاب: الحمد لله الأغاني نجحت وخاصة أغنية بتمنى أنساك، وفي يوم كلمت الدكتور بتاعي وتوما وتامر حسين وقلت لهم أنتوا ليه إدتوني الأغنية دي؟ نجاحها كان يخوف، وأنا أستحق النجاح ده الحمد لله.
رسالة شيرين عبد الوهاب لجمهورها: حبوا اللي بتعملوه.. ويا رب أفضل حقيقة وكل حاجة شفتوها لايف
ووجهت شيرين عبد الوهاب، رسالة لجمهورها، قائلة: حبوا اللي بتعملوه، لو زبال حب شغلك، لو صحفي حب شغلك، لو واحدة شغالة في البيوت خلي عندك أمانة، لكل مجتهد نصيب، مبقاش يهمني أطلع في حفلة ألبس إيه ولا أعمل شعري أكسجين، اللي بيهمني هقدم إيه للناس، يا رب أفضل حقيقية عمري ما هضحك عليكم وكل حاجة كنتوا بتشفوها لايف.
