غصب عني وقلبي كبير.. أول تعليق من زوج صفع زوجته بعد إعلان زواجه بصديقتها
أثيرت حالة من الجدل على مقطع فيديو تصدر تريند منصات التواصل الاجتماعي، بسبب زوج يصفع زوجته على وجهها بعد إعلانه عن زواجه للمرة الثانية من صديقتها خلال احتفالهما بـ مرور عام على زواجهما، وفي هذا السياق كشف الزوج في تعليقه على الواقعة حقيقة هذا المقطع المُنتشر.
ضربتها غصب عني وقلبي كبير.. أول تعليق من الزوج الذي صفع زوجته
وقال الزوج إسلام السيد في تصريحات خاصة لـ القاهرة 24: الفيديو حقيقي.. وكنت عامل لـ زوجتي أسماء مفاجأة إني هتجوز عليها صاحبتها يوم عيد جوازنا، مضيفًا: أنا وأسماء قصة حب 8 سنين وجوازنا كان من سنة، وعملت لها امبارح احتفال بمناسبة عيد جوازنا، وفجأة اتقدمت لـ بسنت صاحبتها في القاعة، وأسماء وبسنت صحاب من 3 سنين.
وعن صفعه لزوجته أمام الجميع، قال إسلام: أسماء انهارت وعيطت وضربتني وكانت عايزة تضرب بسنت، وده اللي خلاني أضربها، لكن أنا ندمت إني ضربتها بـ حركة لا إرادية.. واحنا مش متعودين إننا نضرب بعض أو أمد إيدي عليها.. لكن هي بتخاف مني.
وأردف: أنا قلبي كبير ويكفي الاتنين عادي، مكنتش عايز أقعد مخبي حبي أنا وبسنت كل ده احنا حسينا حاجات ناحية بعض وصارحنا بعض، وده كان أكتر وقت مناسب لأني كنت لسة مفرح أسماء بالاحتفال والهدية، فـ كنت عايز أوصلها أن مش هيكون في فرق في التعامل، وهي حفلة واحدة للاتنين وخلاص.
صاحب الفيديو: معرفش إن الفيديو هينزل
وواصل إسلام: أنا معرفش إن الفيديو هينزل.. والفيديو نزل على صفحاتنا الرئيسية من مسؤول السوشيال ميديا، لكن مش متضايق أنا كدة كدة كنت عايز الناس كلها تعرف إني بحب بسنت صاحبة أسماء، ودي مش حاجة شخصية.. وعشان احنا بتوع يوتيوب الناس كلها صورت وكانت عايزة تاخد لقطة وينزلوها عندهم ويجيبوا ريتش.
وأضاف: مسؤول السوشيال ميديا بتاعنا شاف أن الناس نزلت فيديوهات من الحفلة قال ميخسرش الريتش واحنا صحاب الموضوع من الأساس، نزل فيديو الخناقة على صفحاتنا الرئيسية.
وأشار إسلام: الهجوم في التعليقات عادي وده طبع المصريين ولو كنا عملنا أي حاجة تانية كانت هتبقى تريند أيضًا، وأنا مش بشوف التعليقات دي ولا كأنها موجودة بالنسبالي، ومش فارق معايا ملايين المُشاهدات والمُتابعين لأنها جاية من حاجة سلبية، لأنهم مش بيحبوني.
الزوج: صاحبة مراتي هي اللي هتعوضني
وعن علاقته بـ زوجته الأولى أسماء، قال: ساعات كتير بتفتكر إن الشخص ده هيكفيني عن العالم، وتكتشف فجأة أنه مش معوضني عن كل حاجة، وفي حاجات كتير أوي ناقصة.. وبسنت التانية هي اللي هتعوضني، كنت عارف أن أسماء كانت هتعترض وهتخرب الدنيا، بس أنا كان غرضي إني أوضح الأمور وأصارح بسنت عشان متفتكرش إني بضحك عليها.
ويُذكر أن انتشرت مقاطع عبر منصات فيسبوك وإنستجرام وتيك توك، للزوجين أسماء إبراهيم، وإسلام السيد، التيكتوكرز المشاهير بـ سوسو والصياد، خلال احتفالهما بعيد زواجهما الأول، تضمن هذه المقاطع شجارا بينهما خلال الحفل بسبب كشف إسلام عن زواجه للمرة الثانية على زوجته الأولى أسماء من إحدى صديقاتها.
وظهر إسلام وأسماء يتشاجران في الفيديو خلال احتفالهما، وخلال غضب أسماء صفعها إسلام وطالبها بالصمت وعدم الاعتراض على زواجه من صديقتها يوم احتفالهما بعيد زواجهما الأول.
