أبرز تصريحات ليزا بطلة هند والدكتور نعمان: غبت 40 سنة بسبب الهجرة.. وزعلت لرحيل كمال الشناوي ورجاء الجداوي
حلت ليزا طفلة المسلسل الشهير هند والدكتور نعمان، بطولة الفنان كمال الشناوي، ضيفة على الإعلامية منى الشاذلي، في برنامجها معكم، في أول ظهور لها بعد غياب 40 عامًا عن مصر والوسط الفني، وتحدثت خلال اللقاء عن سبب اختفائها وكواليس عملها مع الراحل كمال الشناوي، والزعيم عادل إمام.
أبرز تصريحات ليزا مع منى الشاذلي
- اختفيت عن الوسط لأن عائلتي قررت تهاجر أمريكا سنة 1989.
- أنا قعدت 3 سنين حالتي صعبة، مكنتش فرحانة خالص، وإخواتي كلهم مكنوش فرحانين خالص.. ووحشتنا عيشتنا وشقتنا ومصر، وكل حاجة كانت وحشانا قوي.
- روحنا مكان وكنت فرحانة ولقيت الفنان الكبير كمال الشناوي داخل، وكان قمر ومش عجوز لكن بيمثل إنه عجوز، وقعد يكلمني ويهزر معايا، وأنا قاعدة أقول كان بيمثل مع شادية في أفلام الأبيض والإسود وبحبه أوي ومش مصدقة نفسي.
- لما كمال الشناوي سألني أنتي عارفة أنا مين؟، قلتله أنت مش عارف نفسك مين؟، وأنا قلت كده لأني نسيت اسمه.
- مسلسل هند والدكتور نعمان اتصور في تونس، أفتكر علشان يتعرض في العالم العربي كله مش في مصر بس، وفيه أجزاء اتصورت في مصر زي الشارع اللي مسكت فيه المجرم والنادي.
- فاكرة إن كمال الشناوي كان بيعمل ضفيرة شعري ودايما أزعل لما يسيب حتة منها، وفي تونس كنا علطول بناكل مع بعض.
- زعلت لما جيت مصر ولقيت كمال الشناوي ورجاء الجداوي والناس كلهم في السما، كنت أحب أشوفهم تاني، وكمان المخرج رائد لبيب، اللي كان بيجيبلي شوكولاتة كل يوم.
- زوزو نبيل كانت زي ماما وتقعد تحكيلي حكايات، وكنت حنينة أوي، وكنت حاسة إني قاعدة مع عيلتي.
- وقت تصوير فيلم كراكون في الشارع، عادل إمام ويسرا علموني ألعب كوتشينة، ومكانش شغل أنا كنت بروح الشغل معاهم عشان أضحك وأنبسط.
- عادل إمام عظيم وقلبه طيب وبيحب الناس، وكان يسلم على الناس بالحضن ويبوس راسهم.
- مسرحية الهمجي دي بتخلي جسمي يقشعر وخصوصا آخر مشهد، اشتغلت المسرحية لكن اتصورت بطفلة تانية.
- في يوم المسرحية كانت شغالة ومحمد صبحي كان بيعمل حركة ويا حرام عملها غلط ووقع على ركبته وكسرها، وفضل في الجبس 6 أسابيع.
- محمد صبحي في المسرح كان محترف، كل حاجة بوقتها ونظام، وهو إنسان عظيم والشغل شغل.
- التمثيل فكرة طول عمرها كانت في مخي، لكن أخدت وقت أكون أم لعيالي، دلوقتي عيالي مش موجودين وفي أفكار وحاجات بتتعرض وبنشوف.
