شوبير ينتقد ظهور الحكام قبل نهائي السوبر: هل بعد كل مباراة هنستضيفهم؟.. عمري ما شوفت كده
أبدى الإعلامي أحمد شوبير اندهاشه من الظهور التلفزيوني للحكام، قبل نهائي السوبر والذي سيجمع بين الأهلي والزمالك.
تصريحات أحمد شوبير
وقال شوبير في تصريحات تليفزيونية: مستغرب ظهور الحكام في التليفزيون، مذهول من حكام لعب امبارح مباراة للأهلي والزمالك وتاني يوم يبقوا ضيوف، وأنا عمري ما شوفت دا ولو مباراة في نهاية الموسم ماشي، لكن مينفعش في وسط البطولة يحصل كدة، والمفارقة إن كلهم موجودين في المباراة النهائية غدًا.
وأضاف: هل بعد كل ماتش هنستضيف الحكام؟.. وبلاش يا سيدي يتكلموا في الكورة.. هيتكلموا ازاي بيقشروا البطاطس؟ وازاي بيسلقوا البيض وازاي بيحمروا اللحمة وازاي بينزل من البيت الصبح عشان يعمل رياضته؟ وازاي بيروح يتمرن؟!.. دا حكم ظهوره بيبقى نادر ومحدود وفي أضيق الحدود.. وأرجو الظهور يبقى بحساب.
وأوضح شوبير خلال تصريحاته: لازم ناخد بالنا من الأمور دي، ولو كانت البطولة خلصت، وأنت استضفت الحكام مقبول، لكن في وسط البطولة أمر غريب وعجيب.
طاقم تحكيم مباراة نهائي السوبر المصري بين الأهلي والزمالك
وأعلن اتحاد الكرة المصري طاقم تحكيم مباراة نهائي السوبر المصري بين الأهلي والزمالك، وجاء على النحو التالي:
- حكم ساحة: أمين عمر.
- حكم مساعد أول: محمود أبو الرجال.
- حكم مساعد ثانِ: أحمد حسام طه.
- حكم رابع: أحمد الغندور.
- حكم تقنية فيديو: محمد معروف.
- حكم تقنية فيديو مساعد: محمود عاشور.
