حاولت أفديه معرفتش.. ننشر أقوال أحمد فتوح كاملة قبل الحكم عليه في قضية الدهس بالساحل الشمالي

تصدر بعد قليل محكمة جنايات مطروح حكمها في ثالث جلسات اللاعب أحمد فتوح بتهمتي القتل الخطأ، وقيادة سيارة تحت تأثير المواد المخدرة.

أقوال أحمد فتوح كاملة قبل الحكم عليه في قضية دهس الساحل الشمالي

استمعت جهات التحقيقات في وقت سابق، لأقوال أحمد فتوح لاعب نادي الزمالك في اتهامه بتعاطي المخدرات خلال قيادة السيارة في حادث الدهس بالطريق الساحلي، معترفا بتسببه في الواقعة.

وقال في تحقيقات القضية التي حملت رقم 1939 لسنة 2024 جنايات قسم العلمين المقيدة برقم 1377 لسنة 2024 جنايات كلي مطروح والتي حصل عليها القاهرة 24: أيوة أنا عملت الحادث بس مكنتش شارب حاجة وكنت مركز، أنا كنت ماشي وهو بيتفادى عربية تانية وهو بيعدي أنا خبطته، وكنت سايق على سرعة 110 كيلو.

وأوضحت التحقيقات أنه خلال عبور المواطن الطريق الساحلي السريع من الناحية البحرية إلى الناحية القبلية وعلى أقصى يسار الطريق، تصادف مرور السيارة بقيادة اللاعب بسرعه فائقة، أدت إلى الاصطدام بالمتوفى وتناثره إلى عدة أشلاء بعدة أماكن متفرقة، من بينها داخل السيارة التي ارتكب فيها الحادث والتي تم تجميعها بمعرفة رجال الإسعاف من مناطق مختلفة على الطريق، وتبين توقف السيارة على بعد 500 متر تقريبًا من موقع الاصطدام.

كما أقر أحمد فتوح لاعب نادي الزمالك بارتكاب الواقعة، لكن دون تعاطي الحشيش، موضحًا أن: اللي حصل إن أنا كنت في قرية ساحلية بقالي 3 أيام النهاردة الرابع، وامبارح الكابتن محمد صبحي وأحمد صاحبنا  كانوا معايا، اتفقنا نروح نتعشى بالليل في أحد المطاعم في العلمين، وبعد ما اتعشينا ركبنا العربية بتاعتي والكابتن محمد صبحي كان قاعد قدام جنبي وأحمد اللي كان معانا قاعد ورا في النص.

واستطرت فتوح: وكنا راجعين على القرية، ومرة واحدة لقيت واحد بيعدي الطريق وبينادي عربية كانت معدية جنبي فخبطه.

وأردف: قبل ما أخبطه، أحمد اللي قاعد ورا قاللي الحق الحق، وهو وده اللي خلاني أخد بالي من العربية اللي جنبي وهي بتعدي والراجل بيناديها وأنا بخبطه، أحمد اللي كان قاعد ورا كان بيصوّت وكابتن محمد صبحي نط من العربية، ولما وقفت لقيت في جزء من الجثة جوه العربية مش عارف دخل منين.

وأكمل أحمد فتوح لاعب نادي الزمالك: إحنا طلعنا من قرية هاسيندا باي ومشينا على الطريق الساحلي  اتجاه مطروح ولفينا من أول کوبري ورجعنا تاني اتجاه الإسكندرية، وبعد كده لفينا تاني وروحنا مطاعم بالبو اللي جنب ريكسوس، أكلنا سوشي وسالمون وبعد كده اتحركنا من المطعم كنا راجعين هاسيندا باي تاني.

وعن سؤال كيفية وقوع الحادث خلال قيادته السيارة، أوضح أحمد فتوح لاعب نادي الزمالك أمام جهات التحقيق: اللي حصل أنا كنت ماشي في الحارة اللي في النص واللي خلاني أخد بالي أحمد حسن عشان مرة واحدة قالي حاسب فبصيت بسرعة لقيت واحد بيعدي وکان هيتخبط من عربية تاني وحاول إنه يفاديها فجري معايا في نفس الاتجاه وبعد كده خبط فيها، وبعد كده لقيت جزء من جسمه جوه العربية.

دفاع أحمد فتوح خلال جلسة محاكمته: نطالب باستمرار إخلاء سبيل المتهم لاستكمال إجراءات التصالح

ممثل النيابة في قضية أحمد فتوح: لم يحاول تفادي الضحية.. وهذا دليل على عدم يقظته

وأكمل أحمد فتوح لاعب نادي الزمالك أمام جهات التحقيق: محمد صبحي والعربية بتهدي نط منها وأحمد حسن نزل قعد يصوت وأنا هديته والضباط جه في ساعتها مكملش 5 دقايق، ومكنتش قادر أحدد المسافة بالظبط ما بيني وبين المجني عليه وهي حوالى من 15 إلى 20 مترا، وكنت شايفه بس هو كان مش بعید أوى ومش قریب.

واستطرد أحمد فتوح لاعب نادي الزمالك أمام جهات التحقيق: أنا أول ما أخدت بالي منه ضربت فرامل وكلاكس بس مش للآخر عشان إحنا ماشيين عربيات ورا بعض، وحاولت أفاديه وجيت على الشمال، وكنت مذهول من اللي بيحصل.