جوميز: قصة السوبر الإفريقي انتهت.. ولو فكرنا في النهائي هنخسر مباراة بيراميدز
تحدث جوزيه جوميز المدير الفني لفريق الزمالك على مباراة بيراميدز، في الدور نصف النهائي لمسابقة كأس السوبر المصري.
تصريحات جوزيه جوميز
وقال جوميز في تصريحاته خلال المؤتمر الصحفي قبل مباراة الزمالك وبيراميدز: دونجا أصيب وحاول يجري في الملعب لكنه مكنش قادر يكمل، لكنه شغال معانا كويس، وممكن يرجع في أسرع وقت وممكن ميبقاش موجود، وإحنا عندنا توازن وأي حد هيلعب هيأدي بنفس الأدوار المطلوبة.
وأضاف: لعبنا مباريات ودية كويسة جدا وأنا وضعت اللاعبين تحت ضغط عشان أجهزهم لمباريات السوبر، وكنت مبسوط بلاعبي الزمالك في التوقف الدولي، وهنلعب بطولة مهمة جدا ضد واحد من أقوى الفرق الموجودة.
وأردف مدرب الزمالك: قصة السوبر الإفريقي انتهت وعشان نكسب مباراة بكرة لازم نأدي بأقوى حاجة عندنا، ونقفل صفحة البطولة اللي فاتت.. وبغض النظر عن مباريات الزمالك وبيراميدز الماضية وإننا كعبنا عالي بس المباراة دي هتتلعب على التفاصيل الصغيرة، واللي أنا بفكر فيه دلوقتي هو إزاي نكسب بيراميدز ولو فكرنا في المباراة النهائية من دلوقتي هنخسر أمام بيراميدز.
وأكمل جوميز: بيراميدز لديه إسكواد قوي ومتوازن وعندهم لاعيبة قوية وسريعة، وجامدين في حركة التنقل بالكرة ومن غير كرة هما فرقة قوية، وكل الفرق الموجودة تقدر تكسب بعض، ونقدر نقول مبروك لـ الإمارات والناس اللي هتتفرج على المباريات دي هتستمتع.
واختتم مدرب الزمالك تصريحاته قائلا: كل الناس عايزين فتوح يرجع لأنه لاعب رائع، والكرة محتاجة حد زيه، والكرة قبل ما توصل لفتوح بتبتسم، ونقدر نقول أنه لاعب شوارع، وبيلعب في الشارع كتير، وبيعمل حاجات هايلة جدًا، وفيه مساحات ضيقة، وأتمنى الحظ السيء الموجود معاه ينتهي بأسرع وقت وكل الناس اللي حواليه بيعانوا معاه وأتمنى دا ينتهي سريعا.
