أحد المتهمين بسرقة 1100 تابلت: عرفت إن الأجهزة مسروقة لما الأمن راح لكوكو آند إس| خاص
ينفرد القاهرة 24 بنشر التحقيقات في قضية سرقة 1100 تابلت من مقر وزارة التربية والتعليم، بمدينة مبارك التعليمية، بمدينة الـ6 من أكتوبر، والتي كشفت عن تورط أصحاب محلات كوكو آند إس، وكذلك أصحاب فاترينات موبايلات بشارع عبد العزيز، وطالب بالجامعة، وعامل البوفيه العقل المدبر لواقعة السرقة.
تحقيقات قضية سرقة تابلت وزارة التربية والتعليم
وبمثول المتهم أحمد. ع. ا البالغ من العمر 37 سنة، ويعمل صاحب محل لبيع للهواتف المحمولة، وبسؤاله حول ما هي أقواله فيما هو منسوب إليه من أنه متهم بإخفاء منقولات أجهزة الحواسيب اللوحية المبيئة بالأوراق وصفًا وقيمة والمملوكة لوزارة التربية والتعليم حال كونها متحصلة عن واقعات سرقة مع علمه بذلك على النحو المبين بالأوراق؟ أنكر التهم الموجة إليه قائلًا: محصلش.
س: ما الذي حدث إذًا وما هي ظروف ضبطك وعرضك علينا؟
ج: اللي حصل إن أنا شغال صاحب محل موبايلات في شارع عبد العزيز، وجالي واحد تاجر أعرفه اسمه رأفت وعرض عليَّ جهاز تابلت فخدت منه الجهاز بـ 3250 جنيها، وبعدين فتحت الجهاز عشان أشوفه تبع الوزارة وعليه منظومة بتاعت التربية والتعليم، أو الشفرة بتاعت التربية والتعليم ولقيته مش عليه المنظومة ولا الشفرة بتاعت التربية والتعليم، فقلت له أنت جبته منين قالي ده جي بواقي جمارك لأن الجهاز ده قديم، وخدت منه ساعتها 60 جهازا.
وأكمل المتهم في اعترافاته: وبعد كده عرفت بالصدفة من واحد معرفه، إن الحاجه ديه جايه من واحد اسمه بندق وقالي ما أجيبهالك بسعر أرخص واسترزق فيها، واتفقت معاه وجابلي من بندق حوالي 920 جهازا من اللي اسمه بندق والكلام ده مكنش مرة واحدة، كان على مدار الشهرين اللي فاتوا، وبعدين يوم الأحد اللي فات 8/9/2024 اتصل بيَّ واحد تاجر واخد مني 500 جهاز، كان بايعهم لمحل اسمه كوكو آند إس، والمحل ده عشان يبيع الكميات دي عمل فيديو وإعلانات.
وأردف: ولما كلمني الشخص ده قالي أنت متأكد إن الأجهزة دي مش بتاعت مدارس، قولتله لا اللي جابهم لي قالي إنهم بواقي جمارك، ولأن الأجهزة دي بره المنظومة بتاعت التربية والتعليم، فراح قالي إن في حد عامل معاه مشاكل وإن الحكومة راحت لمحل كوكو آند إس، وإنه تقريبًا فيه مشكله، فأنا اتواصلت مع اللي اسمه بندق عشان أتاكد منه برضو وقلت له ييجي لي أقابله؛ عشان كنت قلقان من الموضوع وقلت لو طلع في حاجة أقدر أتمكن منه؛ لأن هو اللي بايع لي ولما قابلته خدت واحد صاحبي برضو، وأنا بصراحة كنت خايف وشاكك لا يكون هو سارق الأجهزة فخدته وطلعت بيه على القسم بتاع أول أكتوبر.
وأضاف: عشان لو في أي حاجة أبقى أثبت براءتي، وبعدين وإحنا في القسم قابلنا، وقلت لهم كل حاجه وقالولي إن أنا اللي بايع للراجل اللي باع لمحل كوكو آند إس، وإن اللي باعلي هو بندق وكان معايا ساعتها وفضل الضابط يسألني على كل حاجة وطلب مني أجيب له الأجهزة اللي عندي، واللي لسه موجودين كانوا حوالي 627 جهازا، وبعدين فضلوا مقعديني هناك، لغاية ما جابوني هنا، وأنا والله ما كنت أعرف أن الأجهزة مسروقة.
اعترافات أحمد جلاكسي في قصية سرقة تابلت التعليم
س: متى وأين حدث ذلك؟
ج: أنا اتقبض عليَّ يوم 8/9/2024، في قسم أول أكتوبر، الجيزة.
س: ومَن كان برفقتك آنذاك؟
ج: كان معايا رفعت وبندق.
س: وما هي طبيعة العلاقة فيما بينك وكل من المتهمين هاني. ك، ومحمود. م، وأحمد. م؟
ج: أنا معرفش أي حد من دول واللهِ.
س: وما هي طبيعة العلاقة فيما بينك وبين كل من المتهمين محمود. م، وحسام الدين. م، ومحمد. ح، وحازم. ع، ورفعت. ص، ومحمد. س؟
ج: أنا معرفش في دول غير رفعت الملقب بـ بندق؛ لأن هو اللي أنا اتعاملت معاه وجابلي الأجهزة.
س: وما مدى علمك كون تلك الأجهزة متحصلة عن واقعات سرقة؟
ج: واللهِ أنا معنديش علم، ومعرفتش غير لما روحت القسم
س: ما قولك فيما قرره المدعو أحمد. ح إذًا بالمحضر رقم 10267 لسنة 2024 جنح أول أکتوبر، المؤرخ في 5/9/2024، والثابت به تلوناه عليه؟
ج: أنا واللهِ ما عرفت الكلام ده غير لما حد بلغني بأن في مشكلة، وساعتها أنا اللي روحت القسم بنفسي، وخدت معايا الراجل اللي أنا خدت منه الأجهزة؛ عشان لو في أي مشكلة، ولما عرفت أن الأجهزة مسروقة رجعت كل اللي الأجهزة اللي عندي.
س: وما قولك فيما أتبعه سالف الذكر بشهادته لدى سؤاله بتحقيقات النيابة العامة الثابت بها تلوناها عليه تفصيلًا؟
ج: أنا معرفش أي حاجه عن الموضوع ده.
س: ومَن هو القائم على ضبطك تحديدًا؟
ج: أنا رُحت القسم بنفسي.
س: هل ثمة حديث دار فيما بينك وبين سالف الذكر؟
ج: هو سألني على الأجهزة وإيه اللي حصل، وقولتله نفس إللي حكيته دلوقتي.
س: ما قولك في المضبوطات أجهزة والمبالغ المالية السالف فضها في مواجهتك، وعرضها عليك على النحو الثابت بصدر التحقيقات؟
ج: أنا رجعت كل الأجهزة اللي خدتها كانوا 627 جهازا وباقي الأجهزة اتباعت، وأنا واللهِ معرفش إن الحجات دي مسروقة.
س: وما قولك فيما أتبعه بالمحضر رقم 15 أحوال، المحرر بضبطك تنفيذًا لأمر النيابة العامة بالضبط والإحضار والثابت به تلوناه عليه تفصيلًا؟
ج: أنا معرفش حاجة خالص، وأنا واللهِ خدت الأجهزة من اللي اسمه بندق، ومعرفش أي حاجه عن أن الأجهزة دي مسروقة.
س: هل تم ضبطك في قضايا مماثلة من قبل؟
ج: لا يا فندم.
س: هل لديك ثمة سوابق جنائية؟
ج: لا الحمد لله.
س: أنت متهم بإخفاء منقولات أجهزة الحواسيب اللوحية المبينة بالأوراق وصفًا وقيمة والمملوكة لوزارة التربية والتعليم حال كونها متحصلة عن واقعات سرقة، مع علمك بذلك على النحو المبين بالأوراق؟
ج: محصلش.
