اعترافات سائق الميكروباص بمعدية أبو غالب: نزلت من العربية عشان أعاتب شباب عاكسوا البنات واكتشفت إنها غرقت| خاص
قضت محكمة جنح مركز إمبابة وكرداسة، أمس الاثنين، بتأجيل أولى جلسات محاكمة المتهمين في حادث ميكروباص معدية أبو غالب بمنشأة القناطر لجلسة 21 أكتوبر.
تحقيقات قضية معدية أبو غالب
وحصل القاهرة 24 على التحقيقات في قضية غرق معدية أبو غالب، والتي توفي فيها 16 فتاة وسيدة، وجاءت أقوال سائق الميكروباص كالآتي:
اسمي محمد خالد عبد الجواد علي 22 سنة، أعمل سائق، واللي حصل إن أنا كنت سابق عربيتي الميكروباص ومحمل عليها 26 بنت من العمالة، وواخدهم من المنوفية ورايح بيهم يشتغلوا في محطة تعبئة وتصدير فواكه، بمطلع الثروة الخضراء قرية أبو غالب، وأنا معدي بالعربية من على معدية محطة أبو غالب والبنات راكبين في العربية كان في شباب في المعدية بيعاكسوهم من شباك العربية، وهما معديين من جنبنا فأنا نزلتلهم من العربية علشان أرد عليهم وأعاتبهم وعربيتي كانت آخر عربية في الصف وأقرب عربية للمياه.
وأضاف سائق معدية أبو غالب في التحقيقات: العيال دول قاموا مسكوا في هدومي وحصلت بينا مشادة والمعدية اتهزت قامت العربية اتحركت من مكانها، وريحت واحدة واحدة، لحد ما وقعت في البحر وأنا حاولت أجري وراها ألحقها بس معرفتش لحد ما وقعت بحالها والبنات غرقوا وأنا بعد الحادثة فضلت واقف في مكاني وأشوف مين اللي طلع ومين اللي مطلعش ومرضتش أتحرك من مكاني، لحد ما الحكومة نزلت المكان وسألوني هو أنت سواق الميكروباص قلتلهم أيوه، وخدوا مني البطاقة وقالولي استني معانا شوية وفضلت واقف معاهم هناك وبعدها خدوني المركز وقعدت هناك شوية وبعدين عملولنا محضر وجابونا النيابة وده كل اللي حصل.
س: كم عدد الركاب مستقلي سيارتك وقت ركوب الحادث؟
ج: أنا كنت مركب حوالي 26 واحدة.
س: ما سبب تحميلك لعدد يفوق سعتها الاستيعابية؟
ج: علشان عندنا عربيات البلد كلها بتحمل كده في العمالات والعمالة بيعملوا كده علشان يوفروا مصاريف الانتقالات وأنا لو قلتلهم لا هيقولولي امشي وهيشوفوا ميكروباص غيري.
س: ما هو موضع استقلال كل منهم لسيارتك؟
ج: أنا العربية بتاعتي 14 راكب أنا يكون قاعد على كرسي السواق والكرسي اللي جنبي كان قاعد عليه واحدة ست واتنين بناتها والعربية من ورا فيها 4 بنات و3 كراسي قلاب ناحية اليمين والعربية كلها كانت مليانة بنات على كل الكراسي وقاعدين على رجول بعض.
س: كم عدد المركبات التي تواجدت على متن الناقلة آنذاك؟
ج: مش فاكر بس هما كانوا كثير.
س: أتقف على هوية مستقلي تلك المركبات؟
ج: لا، معرفش حد منهم.
س: ما هي كيفية اصطفاف المركبات على متن الناقلة عقب صعودها إليها؟
ج: إحنا أول ما بنطلع المعدية كل عربية بتطلع بوشها ويتاخدلها مكان بتركن فيه والعربيات بتركن على المعدية علي هيئة 3 صفوف جنب بعض.
س: من هو الشخص المسئول عن تسكين المركبات بأماكن تموضعها أعلى الناقلة؟
ج: اللي بيبقي واقف مع قائد المعدية هو اللي بيقول لسواقين العربيات يركنوها فين على المعدية.
س: منذ متى وأنت تباشر ذلك العمل ؟
ج: أنا بسوق ميكروباصات من حوالي 3 سنين.
س: ما هي درجة إتقانك للقيادة؟
ج: أنا بسوق كويس ومتعلم السواقة وبسوق بقالي 5 سنين وسوقت عربيات نقل جامبو ونص نقل دبابة وملاكي وجرارات لودر وميكروباصات.
س ما مدى حملك رخصة قيادة ؟
ج: أنا معييش رخصة قيادة وبسوق من غيرها.
س: ما سبب عدم استصدارك لترخيص قيادة ؟
ج: علشان حالتي المادية مش بتسمح إني اطلع رخصة بسبب تكاليفها.
س: ما هي كيفية نهوضك بمهام عملك كسائق؟
ج: أنا بدأت السواقة على العربية النص نقل بتاعت أبويا علشان أبويا شغال مقاول كنت بحمله أنفار لموقع العمل بتاعه واتنقلت من عربية للتانية لحد ما أخويا الكبير اشتري عربية ميكروباص وأنا بدأت اشتغل عليه من سنتريس للقاهرة رايح جاي وبعدها رحت اشتغلت في القرية الذكية بكرداسة باخد زباين من هناك غير كده بشتغل في موسم العنب اللي بيوافق شهرين مايو ويونيو من كل سنة بأني بطلع بالميكروباص بتاعي أخد البنات اللي بتشتغل في مزارع العنب من سنتريس - المنوفية أوصلهم لحد قرية أبو غالب منشأة القناطر.
س: ما نوع السيارة التي تعمل عليها؟
ج: عربية ميكروباص صيني ماركة كينج لونج ولونه أبيض.
س: وما تاريخ صنعها؟
ج: سنة 2016.
س: ما هي آخر مرة قمت فيها بفحص السيارة فنيًا قبل الحادث محل التحقيق؟
ج: مش فاكر بس كان من قريب.
س: وفيم تستخدم تلك السيارة؟
ج: أنا بشتغل عليها سواق وبنقل فيها ركاب.
س: أتستعين بأشخاص في العمل بتلك السيارة؟
ج: لا، أنا شغال عليها لوحدي.
س: وكم راكبًا تتسع له سيارتك؟
ج: الميكروباص بتاعي حمولة 14 راكب.
س أمن خط سير معين تعمل به؟
ج: أيوة، في موسم العنب اللي إحنا شغالين فيه دلوقتي ده أنا باخد البنات اللي بتشتغل في مزارع العنب من سنتريس - المنوفية أوصلهم لحد قرية أبو غالب منشأة القناطر.
س: ما هي نقطة بدايته؟
ج: قرية القناطرين وقرية سنتريس بمحافظة المنوفية.
س: وما نقطة نهايته؟
ج: مزرعة الوفرة لتصدير العنب الكائنة مدق الثورة اتجاه سجن القطا قرية أبو غالب منشأة القناطر محافظة الجيزة.
