بعد الهجوم عليها بسبب إنترفيو العروسة.. ميكب أرتيست أسوان: من حقي أختار عروستي زي ما بتختاروا
تصدرت ميكب أرتيست في أسوان تريند مواقع التواصل الاجتماعي خلال الساعات القليلة الماضية، بعد نشرها ستوري عبر صفحتها على إنستجرام، تنوه فيه عن عدم قبولها أي عروس إلا بعمل إنترفيو لها ما أثار سخرية عدد كبير من متابعيها.
ميكب أرتيست في أسوان
ونشرت ميكب أرتيست تدعى آلاء الورداني، ستوري عبر صفحتها بموقع تداول الصور والفيديوهات إنستجرام قالت فيه: ناس كتير بتتصل وبتروح السنتر وعايزين يحجزوا السنة الجديدة بس أنا لسه مفتحتش حجوزات نهائي لأني مش هاخد، غير عروسة واحدة في اليوم وكمان هعملها إنترفيو زي ما قرأتوا لأني من حقي أختار عروستي زي ما انتو بتختاروا.
وقالت آلاء الورداني في تصريحات خاصة لـ القاهرة 24: تفاجأت بعد ما نشرت الاستوري أن فيه هجوم كبير عليا والدنيا قامت لأن كلمة إنترفيو كل واحد فسرها بمزاجه، ومحدش فكر يسألني خالص ولا يعرف قصدي إيه.
وأضافت: أنا كان قصدي إنترفيو بمعنى أقعد مع العروسة قبل الفرح، وأشوف اللوك اللي هي عايزاه واللي هيليق على بشرتها، ولو عندها مشكلة في البشرة ممكن نحلها سوا ونعالجها، وأعرف منها هي عايزة تظهر إزاي في اليوم عشان يعدي خفيف بدون أي مشاكل سواء على الفلوس أو مشاكل تانية.
ميكب أرتيست تثير سخرية متابعيها بسبب ستوري
وأردفت آلاء الورداني ميكب أرتيست: أفتكر أن وجهة نظري متزعلش حد خالص لأن ده لمصلحة العروسة قبل ما يكون ليا وعشان ميحصلش لغبطة ولا مشاكل لأني قابلت مشكلات كتير في أسوان مع العرائس، بقالي 12 سنة في المجال ده وشوفت كتير، ساعات بتيجي عروسة عايزة لوك مش هينفع عليها وهيكون وحش وعندها إصرار تعمله ولما بشتغل على حاجة زي كده يرجع الناس يقولي شغلك وحش وده إسمي من زمان وأكيد خايفة عليه، وفي مشاكل تانية شوفتها أن العروسة مش معرفة العريس بالمبلغ اللي هيدفع في السنتر، وييجي يوم الفرح يتفاجأ ويعمل مشكلة معايا وده مش ذنبي.
واختتمت آلاء الورداني قائلة: فيه مشاكل بتفاجيء بيها يوم الفرح زي لو الفستان فيه مشكلة، أو العدسات مثلا اتقطعت أو العروسة مش جايبة رموش، أو فيه مشكلة في البشرة وكل ده طبعا هيأثر على اللوك بتاعها وعشان أقدر أساعدها وأجهز كل حاجة هي محتاجها نزلت ستوري.
جدل بسبب فيديو إنترفيو للعروسة
وأثار منشور الميكب أرتيست غضب وسخرية عدد كبير من متابعيها عبر منصات التواصل الاجتماعي، حيث علقت صاحبة حساب: هي عشان العروسة مش حلوة هتترفض في الإنترفيو، وأضاف شخص آخر: إنترفيو إيه بس هو احنا مقدمين على شغل، وأردف شخص: الحق مش عليها الحق على اللي بيروحلها، وعلقت أخرى: عايزة بشرة جاهزة عشان هي دي إمكانياتها، وكتبت صاحبة حساب: يعني أعمل إنترفيو عشان أدفع فلوس؟، وعلقت أخرى: ألبس إيه وأنا رايحة الإنترفيو دة!.
