فقدا البصر.. والد الطفلين عمر وحمزة ضحايا الإهمال الطبي يكشف التفاصيل: عايز أجيب حق عيالي
خطأ طبي جديد يتسبب في فقدان البصر للتوأمين الرضيعين عمر وحمزة، اللذين تعرضا لـ ولادة مبتسرة طارئة في الشهر السابع من والدتهما، لكن فشلت إدارة أحد المستشفيات بمحافظة الدقهلية في مُعالجة الوضع الصحي، مما أدى إلى إيذاء الأطفال لدرجة فقدان البصر وأعمارهما لا تتخطى العام حتى الآن.
فقدا البصر بسبب الإهمال.. الطفلان عمر وحمزة ضحايا الخطأ الطبي
كشف أحمد السيد، والد الطفلين الرضيعين عمر وحمزة، في تصريحات خاصة لـ القاهرة 24، عن ما تعرض له أطفاله من مستشفى الجمالية بمحافظة الدقهلية، قائلًا: ولادي ضحية إهمال طبي واضح، بسبب التشخيص الخاطئ بعد ولادتهما في حالة مبتسرة في الشهر السابع.
وأردف أحمد: الأولاد اتولدوا يوم الجمعة 9 فبراير 2024، وده كان في الشهر السابع بشكل مُفاجئ، وقعدوا في حضانة خاصة 7 أيام، وبعد كده نقلتهم في حضانة مستشفى الجمالية وقعدوا فيها شهر، وخلال الفترة دي كان في حاجة مهمة لازم تتعمل اسمها فحص قاع العين.. ودي حاجة معروفة لكل الأطفال اللي بيتولدوا في ولادة مبتسرة في الشهر السابع، بسبب إن الشبكية مبتبقاش مكتملة وبـ يتم فيها حقن بسيط عشان الأطفال تشوف وتكون طبيعية، لكن هم معملوش ده.
والد الطفلين عمر وحمزة ضحايا الخطأ الطبي يكشف التفاصيل
وأضاف والد الطفلين: محدش حتى بلغني بـ إن دي حاجة المفروض تحصل، رغم إن كان في مشاكل تانية في القلب والسمع وقالولي إن دي بسيطة وسكتنا، وإحنا مكناش نعرف إن في مشكلة في العين، وفضلنا كده لحد يوم 25 مايو 2024 وطفل منهم عينه ورمت فاجأة.
وتابع: لما رجعنا لدكتور الأطفال حولهم على دكتور عيون في عيادة خاصة، ولما روحنا قال ده عندهم انفصال تام في شبكية العين من الدرجة الخامسة نتيجة عدم فحص قاع العين في الحضانة بعد ولادتهما في الشهر السابع، وللأسف الوضع صعب يتلحق دلوقتي واتقال لي إن حصل تدمير كامل للشبكية وصعب عمليات دلوقتي لأن الأطفال أخدوا كميات بنج كتير أوي مش هيعرف ينام منها إلا بـ مُخدر، كان لازم يتم إلحاقه منذ الولادة.
والد الطفلين: الدكتور قالي كنت مشغول
وأكد أحمد والد الطفلين: روحت عملت محضر في المستشفى رقمه 1857 لسنة 2024 في إدارة الجمالية، المستشفى كلمتني وقالت لي ايه اللي يرضيك واحنا نعمله.. قلت لهم أنا عايز عيالي يكونوا كويسين، ولما واجهت رئيس القسم المسؤول بـ أنت ليه مقولتليش ساعة ولادتهم قالي أصل أنا كنت مشغول ومكنتش موجود في المستشفى وقت الولادة.. خرجوا في يوم غير يومي، وكانوا مع دكتور تاني.
واستكمل أحمد: أنا عايز حق عيالي دول مش بيعرفوا يناموا من شدة الألم، عايز ألاقي ولو فرصة بسيطة عشان أقدر أعالجهم وأنقذ الحالة، أنا وزوجتي ربنا مرزقناش بأطفال لمدة 3 سنين وعملنا حقن مجهري دفعت فيه فلوس كتير، أكيد مكنتش هستخسر في عيالي إني أعمله فحص قاع عين بعد الولادة.
