هشام ماجد: عادل إمام مبسوط إننا هنعيد تقديم البحث عن فضيحة.. وهذا الممثل مثلي الأعلى
حل الفنان هشام ماجد ضيفًا على الإعلامية فاطمة مصطفى في برنامجها الراديو بيضحك 9090، وتحدث عن موقف الزعيم عادل إمام بعد علمه بإعادة تقديم فيلم البحث عن فضيحة، معربًا عن سعادته بنجاح فيلم إكس مراتي، مشيرًا إلى أنهُ استعان بدكتور نفسي خلاله.
وتحدث هشام ماجد عن إعادة تقديم فيلم البحث عن فضيحة قائلًا: الزعيم عادل إمام سعيد إننا هنعيد فيلم البحث عن فضيحة وطريقة الفيلم عبارة عن ريميك وبيتعمل في أمريكا طول الوقت أنه بيتاخد يتعمل من القديم مسلسلات، وبيكون نفس القصة بس مش نفس التفاصيل، ومعمول بما يناسب العصر اللي احنا فيه، وبوعد الجمهور إننا هنقدم حاجة كويسة ليهم متقللش من الجزء الأول، وبيناقش الجيل الجديد أكتر لأنهم ماشفهوش، ورامي إمام أكد لي إن الزعيم مبسوط، وأنا كمان متحمس لسه.
وتابع عن نجاح فيلم إكس مراتي قائلًا: سعيد جدًا بالتجربة لأنها خدت وقت كبير جدًا، والورق كان مكتوب حلو وعملنا فيه ورشه بيني وبين الفنانين واستعنت بطبيب نفسي خلال الأحداث.
وتابع عن التعاون مع أمينة خليل ومحمد ممدوح: وجودهم كان مشجع لي لأني بحبهم هما الاتنين، وهما ناجحين جدًا وحسيت إن دي تركيبة حلوة وكانت نقطه فارقة فعلا في الفيلم.
أما عن متابعة الأطفال لأغلب أعماله الفنية تحدث: أغلب جمهوري أطفال، والنوعية بتاعتي حلوة ليهم وما يمنعش إني هقدم حاجه تانيه بس تكون مش خادشة.
وعن علاقته بـ المخرج معتز التوني، ومشاركتهما معًا في أكثر من عمل تابع: زهقت من معتز التوني، والناس بتتحاكى عن اللوكيش بتاعه لأن هو شقي وبيضحك طول الوقت.
وعن مثله الأعلى في التمثيل قال: كريم عبدالعزيز مثلي الأعلى في التمثيل، وهو في حتة لوحده، ومشهد في نادي الرجال السري ده وكان فرصة ليا للمشاركة، ولما بعتولي قولت يلا على طول.
وعن اختيار أسماء جلال في مسلسل أشغال شقة الذي عرض ضمن السباق الرمضاني الماضي، قال: مكنش ينفع نغير أسماء جلال في أشغال شقة، وهي شاطرة جدًا مبسوط إن الدور وصل لكل فئات المجتمع.
