محمد تيمور: لدينا شراكات عربية مع أفلام عديدة بمهرجان الجونة.. وهدفنا نوصل العالمية
تحدث محمد تيمور، رئيس سوق سيني جونة، بمهرجان الجونة السينمائي، عن التجديدات والتغيرات التي طرأت على السوق، خلال تحضيرات الدورة المقبلة من المهرجان.
وقال محمد تيمور، في لقائه مع القاهرة 24: السنة اللي فاتت كان لسه الموضوع بيبدأ ولسه بنعرف الناس إيه هو سوق الجونة والموضوع كان في توجه محلي أكتر، والسنة دي بقى في توجه عربي أكتر وبقى عندنا شراكات توزيع وإنتاج عربية، وده شوية بيكبر السوق الجونة وبيقول إن ده للأفلام العربية مش بس للمصرية.
وأردف محمد تيمور: الهدف نوصل لتوجه عالمي كمان، والسنة اللي جاية يكون في بلاد من الغرب أكتر، ولكن في استراتيجية معينة علشان كل حاجة تحصل، السنة دي التوجه عربي وعندنا ضيوف عرب كتير بيزوروا المهرجان وبنعمل شراكات.
وأضاف محمد تيمور: إدارة المهرجان مصممة على أهمية السوق، وبالتالي بقى في نجاح بيحصل ومحتاجين نكمل ده ونعزم ناس من العالم العربي يشوفوا المهرجان وكبرنا عدد الزوار، وسوق الجونة هيكبر أكتر خلال السنين اللي جاية، والأمل إننا نوصل من المحلية للعربية للعالمية، وإحنا ماشيين في النجاح بشكل محسوب.
سيني جونة تغير علامتها التجارية
ومن ناحية أخرى، سيني جونة لدعم إنتاج الأفلام، المعروف سابقا باسم منطلق الجونة السينمائي، غيرت العلامة التجارية ليسلط الضوء على التزام مهرجان الجونة بكون البرنامج محطة رئيسية لتقديم الدعم المالي والفني لمشروعات الأفلام العربية في مرحلتي التطوير وما بعد الإنتاج، وسيتم اختيار قرابة العشرين مشروعًا للمشاركة في سيني جونة لدعم إنتاج الأفلام.
