أحمد مالك: اتعرضنا لإصابات في كواليس مطعم الحبايب.. وهدى المفتي ممثلة مهمة وعندها كتير
كشف الفنان أحمد مالك، كواليس تحضيراته لدوره في مسلسل مطعم الحبايب، الذي يشارك في بطولته مع الفنانة هدى المفتي، والذي يذاع حاليا حلقاته عبر منصة شاهد vip.
وقال أحمد مالك خلال لقائه مع موقع القاهرة 24، إنه تحمس للدور بسبب رغبته في التعرف على عالم الطبخ، مشيرا إلى أن التجربة كانت ممتعة، متمنيًا أن ينال العمل إعجاب الجمهور.
وعن تحضيرات الدور، أوضح مالك: روحت أول حاجة نزلت مطاعم ووقفت في المطبخ لفترة وحاولت أفهم العالم ده عامل إزاي، واكتشفت إن الوقفة في المطبخ مهلكة وصعبة قد إيه، واتعلمت أساسيات الموضوع وده عرفنى على الدور والشخصية أكتر وأنا حبيت الدور جدا.
وبشأن كواليس العمل، رد مالك: الكواليس كانت ممتعة والكاست كلهم أساتذة وليهم تقل كبير جدا وبذات في تاريخ الكوميديا رهيب يعنى، فطبعا ده كان بيتعكس عندنا فى اللوكيشن فالموضوع كان لذيذ، وهدى المفتى من الشخصيات اللى تحس أنك اشتغلت معها قبل كده لمدة سنين طويلة فكان في تعاون وهي ممثلة مهمة وعندها كتير فاستمتعت بالشغل معها.
وأكد مالك أنه تعرض لإصابات وحوادث في كواليس تصوير مسلسل مطعم الحبايب، معلقا: كان طول الوقت بيحصل حوارات طبعا، وايدي تتعور وتتخبط وحاجات غريبة كانت بتحصل بس الحمدلله كل حاجه عدت على خير.
ويعد مسلسل مطعم الحبايب، بطولة كل من أحمد مالك، هدى المفتي، بيومي فؤاد، إنتصار، إسلام إبراهيم، سامي مغاوري، وعايدة رياض، مع عدد من ضيوف الشرف منهم عبير صبري، والعمل من تأليف مريم نعوم وإخراج عصام عبدالحميد وإنتاج عبدالله أبو الفتوح.
