ولادي بيموتوا بالبطيء.. سيدة بالمنوفية تستغيث: معنديش أي دخل ثابت
استغاثت سيدة تدعى مروة لحاجتها إلى عمل تحصل منه على دخل شهري دائم في المنوفية مركز الباجور، إذ إن لديها 3 أطفال تتكفل بهم وليس لديها أي عمل ثابت إضافة لكونها تعاني من الحساسية المزمنة ومرض السكري.
ولادى بيموتوا بالبطيء وكنت هبيع كليتي
وقالت السيدة مروة كامل من مركز الباجور التابع لمحافظة المنوفية في تصريحات خاصة لـ القاهرة 24: أنا عندي 3 أطفال ووالدهم مش موجود معانا، فأنا اللي بتكفل بيهم ومع ذلك معنديش أي شغل ثابت عشان أصرف عليهم، وطبعا محتاجين مصاريف للمدرسة وملابس وأكل وشرب ومش قادرة أوفر لهم أي فلوس.
وأضافت مروة كامل: أي أم نفسها تشوف ولادها أحسن منها، واضطريت أعرض كليتي للبيع مقابل مبلغ 70 ألف جنيه عشان أوفر لولادي احتياجاتهم، وكنت هاخد جزء منهم أعمل بيه مشروع صغير وأتبرع بالباقي لله وبالفعل روحت وعملت كل التحاليل ولكن قبل العملية بساعة أبلغوني أن الحالة توفيت، وأي حد بيديني فلوس وعايشة على التبرعات،
كنت بشتغل في تنظيف المنزل ولكني أصبحت أعاني من مرض حساسية الصدر، وأحتاج إلى علاج بشكل دائم، حتى البخاخة اللي بشتريها بالعافية مش بتكفي معايا لأسبوع، وشقتي صغيرة جدا من أوضة واحدة ومعنديش غسالة، ولا تلاجة.
وأردفت مروة كامل: قعدت عيالي من المدرسة لأن نفسيتهم تعبت وبيموتوا قدامي بالبطيء، لما يروحوا بيوت أصحابهم ويشوفوا عايشين إزاى، والمدرسين في المدرسة طالبين منهم كشاكيل وأدوات غالية وأنا مقدرش أشتري كشكول سلك 100 ورقة بـ 50 جنيه.
واستكملت مروة: والدي طول حياته بيعمل خير في الناس بس دلوقتي أنا محتاجه ومفيش أي جهة خيرية بتساعدني، حتى عيلتي محدش فيهم قدملي مساعدة وهم شايفين ظروفي عاملة إزاى، كمان ولا فيه معاش ولا دخل شهري ليا ولأولادي.
وناشدت السيدة مروة كامل من محافظة المنوفية مركز الباجور الحصول على فرصة عمل دائمة بسبب تدهور ظروفها وحاجتها للعلاج، معقبة: عايزة شغل يكون حلال أصرف بيه على ولادي وأدخلهم المدرسة.
