وشي اتحرق وكنت بخاف أواجه المجتمع.. عامل استورجي يروي تفاصيل معاناته بعد تعرضه لحادث في شبابه
تداول مستخدمو مواقع التواصل الاجتماعي منشورا لعامل استورجي، يدعى وائل عوكل والذي تعرض لحادث تسبب في تشوه وجهه، وأصبح تريند مواقع التواصل الاجتماعي بعد دعم عدد كبير من المستخدمين له.
وشي اتحرق وكنت بخاف أواجه المجتمع
قال وائل عوكل لـ القاهرة 24: أنا حصلي حادثة وأنا في العشرينات المحل بتاعنا ولّع بيا وأنا كنت جوا وجسمي ووش تحرقوا، من يوم الحادثة دي وأنا بنعزل عن الناس ما بحبش أوري نفسي ليهم.
وأضاف: كنت بخاف أواجه المجتمع، وكنت بنزل أشتغل في المحل الساعة 12 بالليل لما الشارع يفضى وبعدين أرجع البيت قبل الفجر قبل ما الشارع ينزل فيه ناس، وأروح أنام طول النهار، وفضلت كدا فترة طويلة.
عامل استورجي يروي تفاصيل معاناته بعد تعرضه لحادث في شبابه
وأوضح وائل: احنا عندنا محل وشغالين في دهانات الأبواب والخشب، أنا شغال استورجي من وأنا صغير مع أبويا، ودخلت الجيش وخرجت وحصلي الحادثة وأنا شاب لسه في بداية عمري.
وأشار: بعد فترة من الحادثة ابتديت أتجرأ وأنزل الشارع الصبح وأنزل أشتغل، كان فيه ناس بتضحك عليا وتدور وشها الناحية التانية، اتعرضت لتعليقات سلبية كتير، بس أنا دايما مكافح وكان كل همي إني أشتغل، وزي ما اتعرضت لتعليقات سلبية كان فيه ناس كتير بتدعمني ووقفت جنبي.
وقدم وائل نصيحة لأي شخص تعرض لحادث أثر على حياته قائلا: فيه حاجة سمعتها من الفنان منتصر بالله حب اللي فيك الناس هتحبك.. لو أنت اتضايقت من نفسك الناس مش هتحبك ومش هتساعدك.
وعن تصدره التريند والتعليقات الإيجابية، أردف: حابب أشكر كل الناس اللي دعمتني على السوشيال ميديا، والحمد لله إن لسه الدنيا فيها خير وفيه ناس كتير كويسة موجودة، ولو هعرف أرد على كل واحد كنت رديت.
