بعد تصدرها التريند.. أول تعليق من أم الصغيرين عقب تبرعها بآخر 20 جنيها معها
تصدر فيديو لأم تعول طفلين بعد طلاقها تريند فيسبوك ، وذلك بعدما تبرعت بآخر 20 جنيها معها للمحتاجين، رغم الديون والمسؤوليات التي تتحملها.
أول تعليق من أم الصغيرين تبرعت بآخر 20 جنيها معها
وتواصل القاهرة 24 مع أم الطفلين والتي تدعى زينب، إذ قالت في تصريحات خاصة: المذيع قابلني بالصدفة وكل اللي طلباه إني أشتغل، عاوزة شغل بمرتب كويس، أنا منفصلة وبشتغل شغل مرتبه بسيط جدًا، وعندي ولد وبنت، وعاوزة مرتب عالي بشغل كويس عشان أصرف عليهم.
وتابعت: طليقي مش بيصرف ولا بيسأل، معرفش عنه حاجة، منفصلين من 3 سنين ومن ساعتها معرفش عنه حاجة.
وأكملت زينب: إياد عنده 12 سنة ونبيلة 8 سنين، مرتبي 1500 جنيه، وباخد سلف من قرايبي، ساكنة في الشقة الزوجية بتاعة حمايا إيجار قديم، أهل جوزي مش بيسألوا عليا، واخواته ميعرفوش عنه حاجة، أنا عايشة لوحدي مع ولادي، وأهلي في إسكندرية قاعدين لوحدهم، وولادي في مدارس حكومية.
وأردفت: أنا دارسة آداب فلسفة، وكنت بشتغل قبل الجواز في شركة سياحة واشتغلت كذا حاجة، هو كان شغال في شركة سياحة بس هو مش عاوز يتحمل مسؤولية ولا يتشغل، أي شغلانة بيروحها بيسيبها.
وواصلت: لما قابلت المذيع قولت له أنا عاوزة وظيفة ثابتة بتعليمي، عاوزة أشتغل مش عاوزة مسابقة، نفسي في شغل بمرتب كويس، قالي: هسألك سؤال وجاوبي معانا وقولي إنك عاوزة شغل وفي ناس هتساعدك، وغيّر السؤال وحرجني لما قالي بنعمل مسابقة للغلابة كسفني جدا، ومش عاوزة أسبب إحراج لولادي، أنا عمري ما أستنيت حاجة من حد.
وعن طليقها أوضحت: طليقي كنت مصداقاه ومعرفش إنه هيعمل فيا كدة، ويسيبلي العيال، قعدت متجوازه 3 سنين وفاض بيا، عندي 35 سنة.
وعن تصدها التريند قالت: بنتي شافت الفيديو بس مش فاهمين إيه اللي بيحصل، مكانش معايا غير 20 جنيه، متوقعتش إني تريند ومحرجة جدًا، في ناس بعتلتي فودافون كاش وكملت لبس ولادي بتاع المدرسة، الناس جابولي شغل في القاهرة بس أنا في إسكندرية مش هعرف أسيب ولادي.
