علشان التريند والمشاهدات.. التحقيقات الكاملة لقضية عريس الدقهلية المزيف
حصل القاهرة 24 على نص تحقيقات القضية المعروفة إعلاميا بعريس الدقهلية المتهم بالتمثيل أمام أسرته في يوم زفافه، بأنه تعرض للخطف من قبل أصدقائه المتهمين بالاشتراك معه في هذه الواقعة.
قضية عريس الدقهلية المزيف
وجاءت أقوال المتهم الأول عريس الدقهلية أمام جهات التحقيق كالتالي: اللي حصل إن أنا كان فرحي يوم الخميس اللي فات وكنت عايز أعمل حاجة وأصورها تبقى تريند وتزود نسب المشاهدات على الصفحة بتاعتي علشان الأرباح تزيد، وبعد كده في آخر الفرح اتفقت أنا وأحمد ومحمد، إنهم الاثنين بعد ما أخرج من القاعة يجوا بعربية ويخطفوني جواها ونعمل مقلب في الناس وبعد كدة ننزله على اليوتيوب، وفعلا هما عملوا اللي أنا قلتلهم عليه وجم بعربية وخطفوني وأنا روحت ونمت، ولما صحيت لقيت المقطع على اليوتيوب ولقيت أهلي منزلين مقطع إنهم بيدوروا عليا روحت ناشر مقطع الفيديو الثاني اللي كنت مصوره وبشرح فيه إن أنا هعمل تريند وهعمل مقلب في الفرح بتاعي، وأنا معايا السلاح وبشيله معايا علشان بسافر ويبقى معايا حمايا ومعرفش إن في ترخيص للمسدس الصوت.
وأضاف: وأنا عندي صفحة على اليوتيوب اسمها جمهورية أحمد وأمل وبعمل فيها مقالب، وعملتها من حوالي 3 سنوات، عشان أكسب فلوس منها عن طريق الإعلانات والمشاهدات.
واختتم المتهم: أنا صورت المقطع دا علشان بنهزر والمتابعين تزيد وأرباح القناة تزيد، وعملت الموضوع كله على سبيل الهزار ومعرفش إنه هيوصل لكل ده.
وقالت زوجة عريس الدقهلية: اللي حصل إن يوم الخميس كان فرحي أنا وأحمد.ج بمنية النصر، وبعد الفرح لما خلص وإحنا ماشيين أحمد ركبني العربية ولما كان بيلف علشان يركب جمبي اتخطف في عربية والعربية طلعت تجرى وإحنا قعدنا نحاول نلحق العربية بس ملحقناش، وإحنا روحنا البيت وصورنا الفيديو علشان الناس تحاول تساعدنا وبعد كدة أحمد كلمني وقالي إن هو كان عامل مقلب وأن دا كله هزار، وأنا وأحمد عملنا القناة من 3 سنين عشان نكسب منها فلوس، ومكنتش أعرف أي حاجة عن المقلب ده، بس أحمد عمله من باب الهزار والضحك، وبننشر على القناة مقالب وتحديات، والعربية اللي اتخطف بيها جوزي دي عربيته.
قضية عريس الدقهلية المزيف
وقالت شقيقة عريس الدقهلية المتهم بالتحقيقات: اللى حصل إن أنا كنت في فرح أحمد. ج أخويا في منية النصر، ولما الفرح خلص وأحمد خارج هو ومراته أمل وبيركبها العربية، لقيت عربية جت جنبه وحد شده جوه العربية، وطلعت تجرى، وبعدها روحنا على البيت بتاع أحمد أخويا ومراته عملت فيديو إن أحمد جوزها اتخطف، وبعدها بحوالي ساعتين أحمد كلم مراته أمل وقال لها إنه مش مخطوف وإن اللي حصل هزار وكان مقلب وعمله فينا، وأنا مكنتش أعرف أي حاجة عن المقلب، وأحمد أخويا صوره من باب الهزار والضحك، وهو له صفحة على اليوتيوب اسمها جمهورية أحمد وأمل، وبيعمل فيها مقالب عشان يزود المشاهدات والمتابعين.
