معتز التوني: اسمي بقى مرتبط بالنقلات الفنية للممثلين.. والمخرج الكوميدي لازم يبقى عنده حس فكاهي
تحدث المخرج معتز التوني عن أول أعماله السينمائية سمير وشهير وبهير، موضحا أن اسمه ارتبط بـ أسماء النجوم في أولى خطواتهم بالبطولة المطلقة.
وقال معتز التوني، في ندوته بالقاهرة 24: أول فيلم سينما ليا كان سمير وشهير وبهير، وكان شيكو وهشام ماجد وأحمد فهمي عاملين فيلم ورقة شفرة، ولكن أول فيلم يعمل إيرادات ويجيب فلوس كان سمير وشهير وبهير، بعدها ربنا كرمني وعملت أعمال تانية وبعدين عملت أول مسلسل بطولة لـ دنيا سمير غانم وهو مسلسل لهفة.
وأضاف معتز التوني: محمد إمام أول فيلم ليه من بطولته كابتن مصر كان من إخراجي، ومحمد إمام قالي الفيلم ده بداية كل حاجة حلوة، وسبحان الله كل الأعمال اللي أول مرة لناس بطولة أو أول نقلة ربنا بيكرمني وبتبقى بتاعتي، وده توفيق من عند ربنا، ودي مسئولية وببقى خايف وعامل حسابي أن المسئولية رهيبة، ولكن ربنا بيكرم علشان بنشتغل كويس على الموضوع.
كواليس مسلسل لهفة
أما عن كواليس مسلسل لهفة لدنيا سمير غانم، أجاب معتز التوني: مسلسل لهفة كان له ظروف خاصة، لأنه أول مسلسل من بطولة دنيا سمير غانم، واتعمل وكان فاضل على رمضان 3 شهور بس، وهشام جمال قالي تعالى نعمل كل حلقة بـ ضيوف شرف، وبنجيب ضيوف كبار بالتالي بنتقل المسلسل.
وأكد معتز التوني أن المخرج الكوميدي يجب أن يتمتع بالحس الفكاهي، معقبًا: المخرج لو فاهم وعنده حس كوميدي أكيد بيفرق في العمل، لأنه لو مش فاهم الضحك جاي منين هتبقى مشكلة، فلازم مخرج الكوميديا بيفهم في الضحك، في ممثل ممكن يجي يقول إفيه حلوة جدًا لو هو مش فاهمه هتبقى مشكلة.
