دينا: الرقص الشرقي علامة مصر.. وبسأل نفسي اللي مبيرقصوش بيعملوا إيه
ردت الراقصة دينا، على سؤال هل يُعد الرقص الشرقي فن أم لا، معربة عن استيائها الشديد من التعليقات التي تلاحق الراقصات، مؤكدة أن الرقص الشرقي هو ما يميز كل بلد وخاصة مصر على حد قولها.
وقالت دينا، في برنامجها اسمع دينا عبر حسابها الشخصي بموقع إنستجرام: ناس كتير بتقول إن الرقص الشرقي مش فن، طيب إيه هو الرقص اللي فن؟، يعني معقول أي حاجة مكتوب عليها صنع في مصر تبقى وحشة؟، عقدة الخواجة، رقص الباليه هو اللي حلو لأنه روسي، لكن الرقص الشرقي اللي هو علامة المصريين وحش مش فن؟، ليه دايمًا الحاجات اللي تحت إيديكم بتضيعوها ومبتهتموش بيها، لكن اللي جاي من برا بيهتموا بيه.
وتابعت دينا: الرقص علامة كل بلد وأول ما تقول رقص شرقي يعني مصر، أوعوا تتنازلوا عن فنكم ده الفن الحقيقي بتاع البلد، كان زمان في البوسترات بتاعة مصر الهرم وواحدة لابسة لبس الرقص، الرقص فن جميل كل العالم بيحترموا وبيعملوا له مهرجانات.
وأضافت: عشت طول عمري بسأل نفسي اللي مبيرقصوش بيعملوا إيه وبيطلعوا إزاي الزعل اللي جواهم، الرقص فن جميل ويُحترم، والعين اللي بتشوفه فن هي العين اللي شبعانة، والعين اللي بتشوفه حاجة تانية لأنها فاضية ومعندهاش إحساس بالفن.
الراقصة دينا تكشف سر شبابها
وسبق وأن كشفت الراقصة دينا، سر شبابها، قائلة: من وأنا عندي 15 سنة لحد النهاردة عمري ما نمت وفي وشي مكياج، وكل يوم بحط كريم في النهار وفي الليل، وعمري ما استحميت ومحطتش كريم لجسمي، وكل يوم بلعب رياضة أو برقص، وطول عمري بعمل الصيام المتقطع من وأنا 15 سنة، وباكل مرة واحدة في اليوم لأن مفيش حاجة عندي أحسن من نفسي.
