عندي طاقة تكسر الكون.. طالب ذوي الهمم بمعهد السينما يبحث عن فرصة عمل: محدش مهتم بموهبتي
تحت عنوان.. عايز شغل، تداول منشور عبر منصة فيسبوك للتواصل الاجتماعي لـ شاب من ذوي الهمم يُدعى أحمد مُحي، طالب بالمعهد العالي للسينما، ليثير تشجيع وحماس الجميع له.
من ذوي الهمم.. طالب بمعهد السينما يبحث عن فرصة: عايز شغل
وكتب أحمد في منشور له عبر حسابه الشخصي على منصة فيسبوك: أنا عايز شغل، أنا طالب في معهد السينما قسم مونتاج.. من ذوي الهمم، مش بتكلم.. بس بسمع، ولكن على عكس توقعات أحمد نال المنشور إعجاب العديد من رواد منصة فيسبوك للتواصل الاجتماعي.
وأردف أحمد مُحي لـ موقع القاهرة 24: في ناس كتير بـ يطلبوا مونتير ولما ببعت شغلي ويعرفوا إني من ذوي الهمم محدش بـ يكلمني بعدها، مع أن شغلي ممتاز الحمد لله بـ شهادة المتخصصين.
أحمد مُحي: متمكن من صناعة السينما والمونتاج
وأضاف أحمد: تخرجت من كلية الآداب قسم مكتبات ومعلومات، وحاليًا أنا طالب في المعهد العالي للسينما وملتحق بـ قسم المونتاج.. لكن مجتليش فرصة شغل كويسة لحد دلوقتي.
وواصل: درست في كلية الآداب وكانت مجرد دراسة عشان يبقى معايا شهادة وبس وبعدين التحقت بمعهد السينما، وحاليًا متمكن من صناعة الميديا والتصوير والمونتاج والإخراج أحيانًا كمان.
أحمد مُحي: عندي طاقة تكسر الكون
وأعرب أحمد عن تجاهل أصحاب سوق العمل لمهاراته، قائلًا: بدور على شغل ومش لاقي، عشان محدش مهتم يشوف مهاراتي وموهبتي، لكن مكنتش متوقع ردود أفعال الناس على بوست فيسبوك.
واستكمل: جاتلي فرص شغل بس حاجات بسيطة فيديوهات مشاريع تخرج وفيديوهات إعلانية وفيديوهات سوشيال ميديا.
واختتم أحمد عن حلمه: نفسي أبقى أهم حد في صناعة السينما والميديا.. عمومًا أنا عندي طاقة تكسر الكون وإن شاء الله هيحصل.
