بسبب 100 جنيه.. صغير ينهي حياته شنقًا والأسرة تكشف التفاصيل
أقدم صغير يُدعى إسلام على التخلص من حياته بعد أن تلقى ضربا مبرحا من أبيه، بشنق نفسه داخل غرفته بالمنزل وتم نقل الجثة إلى أحد مستشفيات منشأة ناصر، لتُصدم أسرته بـ نبأ وفاته.
شنق نفسه.. صغير ينهي حياته بعد أن تلقى ضرب مبرح من والده
وقالت شقيقة إسلام في تصريحات خاصة لـ القاهرة 24 إنها كانت شاهدة العيان على واقعة ضرب أبيها لشقيقها الصغير إسلام الذي يبلغ من عمره 13 عامًا، قائلة: أبويا كان بيضربني كتير أنا وأخواتي.. وساعتها لما جيت أدافع عن إسلام هددني وقال لي ابعدي مالكيش دعوة واضطريت إني أقف مكاني ما اتحركش.. وهو ضرب إسلام وكسر عليه كرسي.
وأضافت شقيقة إسلام: دخلت بنت عمي على إسلام أوضته لقيته شانق نفسه بـ حبل في المروحة، بعد ما أبويا ضربه واتخانق معاه، مُضيفة: أبويا هو السبب في موت أخويا واحنا هنعرف نجيب حقه ازاي.
بسبب 100 جنيه.. أسرة الطفل تكشف التفاصيل
وأردفت: الخناقة الأخيرة كانت بسبب الفلوس، لأن أبويا كان مشغل إسلام من وهو عنده 10 سنين ومخرجه من المدرسة، عشان يجيب له فلوس، وكل يوم كان بياخد أجره يصرفه على نفسه، والخناقة دي كان بسبب 100 جنيه زيادة، وضرب أخويا جامد وبعد كده إسلام دخل أوضته لوحده.
وتابعت شقيقة إسلام أنها تعرضت للعنف الأسري والضرب من قبل أبيها بـ جانب أخويها الإثنين، قائلة: مكنش بيصرف علينا وكلنا بنشتغل ونصرف على نفسنا، عندي 19 سنة وأخويا محمود عنده 18 سنة وإسلام كان عنده 13 سنة، وكان بيخلينا نشتغل عشان ياخد فلوسنا، ولما كنا نجيب تليفونات من فلوسنا كان بياخدها يبيعها عشان ياخد فلوسها يصرفها على نفسه.
ومن جانب آخر، أكدت والدة إسلام: إحنا اطلقنا من 6 سنين وهو رفض إني أخد عيالي، ولما عرفت خبر وفاة ابني إسلام صرخت ورجلي مكنتش شايلاني، هو السبب في موت ابني، وعيالي اللي عايشين هاخدهم منه ومش هسيبهم.
