حكايات محكمة الأسرة | زوجة تطلب الطلاق: بيحب الكورة أكتر مني.. وأخرى: بعد 15 سنة جواز أكلي مش عاجبه
تشهد أروقة محكمة الأسرة، تبادل اتهامات بين الأزواج والزوجات، ويحاول كل طرف الانتصار على الآخر واسترداد حقوقه؛ لنشاهد العديد من القضايا والتفاصيل والحكايات لخلافات زوجية طاحنة، تصل للوقوف داخل أقسام الشرطة والانتهاء في محاكم الأسرة.
أميرة تقيم دعوى طلاق ضد زوجها: بيحب الكورة أكتر مني
أقامت ربة منزل تُدعى أميرة. م، 34 عامًا، دعوى طلاق ضد زوجها بمحافظة سوهاج، بعد خلافات أسرية متكررة فيما بينهما، ورفض الزوج تطليقها، ما دفعها إلى اللجوء إلى محكمة الأسرة.
وقالت الزوجة في دعواها، إنها متزوجة من ابن عمتها منذ 6 أعوام، مشيرةً إلى أن زوجها حريص على متابعة ومشاهدة مباريات كرة القدم أكثر من اهتمامه بها وبمشاكلها.
وأوضحت الزوجة لـ القاهرة 24 قائلة: جوزي أهلاوي متعصب، وبيحب الكورة ومهتم بيها أكتر مني ومن أي حاجة تانية، ومش بيفوت مباراة غير لما يتابعها، وعند مشاكلي مهملها ومهملني، وأنا مش في حسبانه نهائي، ولو البيت كان محتاج حاجه وفي مباراة شغالة استحالة ينزل يشتريها غير لما الماتش يخلص وكمان الاستوديو التحليلي بتاع المباراة.
وأضافت: آخر مرة كانت في مباراة للأهلي وأنا كنت تعبانة ومحتاجة علاج من الصيدلية، ولما قولتله انزل اشتريه زعقلي وقالي لما الماتش يخلص، وما اهتمش إني تعبانه وبتوجع، لحد ما زهقت وحسيت إني مش في حسبانه وإن الكورة أهم مني، وكتير كانت بتحصل خناقات بينا عشان نفس السبب لحد ما زهقت وبقيت مش قادرة أتحمل العيشة معاه ولما طلبت منه الطلاق رفض.
وأمام تصرفات الزوج وتعنته مع زوجته، لم تجد أمامها ربة المنزل سوى ترك منزل الزوجية والإقامة في منزل أسرتها، ورفع دعوى طلاق للضرر الواقع عليها منه.
ربة منزل تقيم دعوى طلاق ضد زوجها بسوهاج: بعد 15 سنة جواز أكلي مش عاجبه
أقامت ربة منزل تُدعى نجلاء. م، 39 عامًا، دعوى طلاق ضد زوجها بمحافظة سوهاج، بسبب خلافات أسرية، واستحالة العِشرة فيما بينهما حسب وصفها.
وقال الزوجة في دعواها، إنها متزوجة منذ 15 عامًا، وخلال فترة زواجهما أنجبت منه 3 بنات، ولم تكن هناك أي خلافات كبيرة بينهما إلا الخلافات الأسرية العادية، مشيرةً إلى أن الفترة الأخيرة لاحظت عليه تغير في المعاملة، وبدأت الخلافات بينهما، حتى وصلت إلى تعديه عليها بالسباب.
وأضافت الزوجة لـ القاهرة 24: من حوالي 6 شهور بدأت معاملته معايا تتغير، وكل ما أعمل حاجه يتلكك عليها عشان يعمل خناقة، وفي آخر الأيام، بدأ يقولي أكلك مش حلو، وإني مش عارفة أطبخ ولا أعمل أكل، مع إنه بياكل من إيدي ليه 15 سنة، لكن الأيام دي اتغير وبقي خلقه ضيق، ومفيش معاه غير الخناقات، ولما شكيت لأهله قالولي حلي مشاكلك معاه بنفسك.
وأكدت الزوجة أنها حاولت معه أكثر من مرة، إلا أنه لم يتغير بل تمادى معها في المشاجرات واختلاق الأسباب للتشاجر معها والتعدي عليها بالقول.
وأمام تعنت الزوج وإصراره على موقفه من زوجته، لم تجد الزوجة حلًا أمامها، سوى ترك منزل الزوجية والإقامة في منزل أسرتها، ورفع دعوى طلاق للضرر الواقع عليها منه.
