أبرز تصريحات أسامة عباس عن أحفاده وحقيقة اعتزاله: يا رب ميتعرضش عليا شغل تاني | فيديو
تحدث الفنان أسامة عباس عن تكريمه مؤخرًا من المهرجان القومي للمسرح المصري، بجانب حديثه عن أحفاده وحقيقة اعتزاله التمثيل.
وقال أسامة عباس عن تكريمه: سعيد جدًا لأني اتكرمت من أكثر من جهة ومن مكان، ولكن التكريم لما ييجي من أبناء بلدي وأبناء مهنتي وفي حياتي بيكون له قيمة تانية خالص وقيمته كبيرة جدًا.
أسامة عباس يتحدث عن أحفاده
وعن علاقته بأحفاده قال أسامة عباس: العلاقة بيني وبين أحفادي صحوبية أكثر من أني جدهم، ومش بيقولوا لي يا جدي بيقولوا لي يا أُس، أقولهم عيب أنا جدكم يقولوا لي الكلام ده كان زمان، وبكون سعيد من جوايا باللي بيقولوه، وناجحين في شغلهم وكلهم خلصوا جامعة ما عدا الأخير أطول واحد فيهم آخر سنة، ولما يخلص يمكن يقولي يا جدي، نفسي حد فيهم يقولي يا جدي، لأن كلهم بيقولوا لي يا أس ولكن ده دليل على حبهم ليا.
وأضاف أسامة عباس: الأجيال الجديدة مش بيعجبها الشغل القديم وبيتفرجوا عليه زي ما إحنا بنتفرج على التاريخ، يعني بالنسبة لهم تاريخ مش متعة، والمتعة بالنسبة لهم مختلفة ونوع الضحك والإفيه مختلفين وحياتهم كلها مختلفة، حتى زمان الشياكة إننا نلبس بدلة لكن دلوقتي الشياكة إننا نقلع البدلة.
أسامة عباس يتحدث عن بدايته
وتحدث أسامة عباس عن بدايته قائلًا: مكنتش متصور أني هستمر في التمثيل وكنت فاكر أنه تحدي وأنا بحب التحدي فهعمله وهرجع شغلي، ولكن رواية في نجاح في رواية ابتدت المسائل تختلف ومراتي ساعدتني وقدرت أنها ما تشتغلش وتتولى تربية الأولاد علشان تديني فرصة انشغل في الشغل لأني كنت بشتغل بالصبح والليل وقدرت أنها تحافظ على الأولاد.
واستكمل: الأولاد مشيوا في حياتهم لكن محدش فيهم مثل ولا حد فكر يمثل، ومشفتش حد فيهم عنده الموهبة الكافية اللي تخليه في المستقبل ممثل والكبير خريج آداب إنجليزي والتاني مهندس يعني كلهم خريجين مستويات أعلى بكتير من اللي إحنا كنا فيها.. ومحدش فيهم اندفع ناحية التمثيل، وكانوا أحيانًا يطلبوا يمثلوا لكن مشفتش حد أصر.
وعن الأدوار التي كان يتمنى أن يقدمها قال أسامة عباس: أنا قدمت كل الأنواع، ومقتنع باللي عملته ودايمًا أقولهم كفاية خلاص الحمد لله قدمت كل الأنواع اللي ترضيني وترضي اللي حواليا وهعوز إيه أكتر من كده في الدنيا.
أسامة عباس يكشف حقيقة اعتزاله
وبشأن حقيقة اعتزاله الفن قال: أنا معتزلتش الفن، ولكن مش عارف إذا جالي شغل هعمله ولا لأ، لأن أنا مبقتش في سن يسمح لي أني أبذل المجهود اللي بذلته في شغلي خاصة أني باخد المسائل بجد، ولو اتعرض عليا دور علشان يعجبني لازم يكون فيه جهد ومعتقدش أني هقدر أعمل الجهد ده دلوقتي، ويا رب ما يتعرض عليا علشان ما اتحطش في الاختبار.
وكشف أسامة عباس سر خلعه للساعة التي كان يرتديها موضحًا: قلعتها علشان ما أكونش مقيد بالمواعيد لأني كنت منضبط جدًا في شغلي.
