إسماعيل البلبيسي بعد مشاركته بحفل حمزة نمرة لـ القاهرة 24: مكانش حد بيقولي صباح الخير وهو الوحيد اللي افتكرني
تحدث الفنان إسماعيل البلبيسي عن كواليس مشاركته مع الفنان حمزة نمرة في حفله بمهرجان القلعة الدولي للموسيقى والغناء الـ 32، وذلك بعد فترة غياب طويلة عن الظهور.
وقال إسماعيل البلبيسي في لقائه مع القاهرة 24: قابلت حمزة وأنا معرفوش وصديق آخر قالي إنه بيحبني وهيكلمني والحمد لله متعاطف معايا وكان بيحبني واللي عمله حاجة كبيرة جدًا لما يغني غنوتي الغربة وبعدها يجبني أغني معاه في حفله رغم أني مش موجود بقالي سنين، أنا أعرف معظم المغنيين والمطربين ومحدش فكر يعمل كده ولا هيفكر لأن كل واحد باصص لنفسه وبس، وبقالي سنين محدش قالي صباح الخير لكن هو الوحيد اللي افتكرني.
وأضاف إسماعيل البلبيسي: حمزة نمرة صحى فيا حاجات كبيرة، خاصة أني شخصيًا عملت حفلات قبل كده لكن أول مرة أغني قدام كم رهيب من الناس بالمنظر ده، والمكان بياخد 10 آلاف لكن جه عشرين ألف وكان بالنسبالي حاجة كبيرة، ومن ضمن الحاجات اللي سمعتها وعجبتني وأسعدتني جدًا أن في واحدة من الحضور كانت بتصور فيديو وبتقول الله يعوض عليك يا ابني الله يعوض عليك، واتبسطت ولقيت إنها كلمة كبيرة جدا مش بتتقال لحد بيغني ممكن تتقال لدكتور أنقذ مريض.
إسماعيل البلبيسي يكشف كواليس مشاركته في حفل حمزة نمرة
وأشار إسماعيل البلبيسي، إلى أنه لم يحضر للمشاركة في حفل القلعة مع حمزة نمرة وأن الموضوع حدث بشكل مفاجئ وسريع، موضحًا: كل اللي حصل بأمر الله لا تحضير ولا أي حاجة، والسنة اللي فاتت حمزة طلبني أشارك معاه في حفله ولكن الظروف ما سمحتش، كلمته من قريب علشان أقابله قال لي الناس بيحبوك وقال لي عندي حفلة بكره في القلعة شارك معايا قلت له صعب ولكنه أصر وروحت وعملنا بروفا واحدة الصبح وغنيت معاه بليل.
