رحلة طبيب أسنان
فاكر فرحة أبويا وأمي لما قررت أسافر أدرس بره، وقد إيه العيلة كانت فرحانة أني هبقى دكتور وأكمل مسيرة والدي وأخويا في طب الأسنان.
وإحنا بنخلص الكلية اتفاجئت أن نقابة أطباء الأسنان المصرية، قررت قرارا عجيبا وغريبا، وهو أن اللي درس بره هيتعامل معاملة الأجنبي، في حين أني لما سافرت كنت أجنبي في روسيا ودخلت الجامعة بشهادتي المصرية وباسبوري المصري!
بس بعدها النقابة قالتلك لا خلاص أنتوا برضه زي ولادنا، وهتدفعوا بالجنيه مش بالدولار بس هتدفعوا 40 ألف جنيه، وللأسف ده القرار النهائي، وقلنا وماله مش هنضيع اللي أتبنى والطريق اللي مشيناه ورجعنا علشان نكمل امتيازنا ونطلع كارنيه النقابة، فنتفاجئ وإحنا في الامتياز يقولك اسكت!، مش تكليفكوا اتلغى؟ اتلغى ازاي وهو لدفعة 25 واحنا المفروض 23، قالك لا هو المقصود الحركة بتاعة التكليف مش سنة التخرج.
ملحقناش نفوق ونركز في الحوار ده وإحنا داخلين على آخر شهور الإمتياز ونخلص، نلاقي طلع امتحان مزاولة مهنة، نسأل، طيب الأسئلة بتاعته مصدرها إيه؟ ولا نشوفها فين علشان نفهم؟ يقولك لا ده بناءً على الحالات اللي أنت شوفتها كدكتور في فترة الامتياز بما أنك عديت على الأقل 6 شهور وهتقدر تحله.
فنبدأ بامتحان التجربة وتكون الأعجوبة التامنة اللي تتضاف لعجايب الدنيا السبعة وتنافس بجدارة برج بيزا المايل، أسئلة عن حالات هشوفها إن شاء الله لو أنا خلصت ماجستير ودكتوراة وزمالة وعبرت مع الرجالة في حرب 73 مش في امتياز جامعي ولا وحدات صحية عادية من اللي بنتعامل فيها.
وتكون محصلة الامتحان، فيه اللي زي حالاتي ذاكر الأول الأسئلة اللي بعض زملاءنا صوروها من الامتحان وحاول يفهم أو بصراحة كده يحفظها فجاب زي حالاتي 54% أو أكتر بحاجات بسيطة، أو ممكن يكون دخل ومتوفقش خالص.
والحقيقة مبقتش فاهم، هو الوضع رايح فين؟ هل هنوصل للمرحلة اللي تخلي الواحد بعد ما فكر كتير واشتاق أنه يرجع بلده تخليه يقول كنت غلطان ولازم اسافر؟ ولا فعلًا فيه حد عاقل ممكن يحاول يساعد علشان ميضعش جيل كامل من الأطباء المفروض لسه بيشق طريقه والمفروض نساعده بدل ما نزود عليه الضغوط؟
