جيهان الشماشرجي: معرفش يعني إيه سناب شات.. وماعنديش روتين لشعري
تحدثت الفانة جيهان الشماشرجي، عن كواليس مشاركتها في مسلسل كامل العدد الجزء الثاني، مشيرة إلى أنها اعتذرت عن المشاركة في الجزء الثالث.
وقالت جيهان الشماشرجي في لقاء إذاعي: أول ما قالوا لي فيه جزء ثاني كنت واثقة إنه هيكون حلو ويعجب الناس.. لأني واثقة في كتابة رنا أبو ريش ويسر طاهر وخالد الحلفاوي، وكنت مطمنة ولما جالي الاسكربت حسيت أنه تحفة والجزء الثاني أحلى من الأول.. واعتذرت عن الجزء الثالث وهما مكملين إن شاء الله يكسر الدنيا أكتر من التاني والأول.
وعن الكواليس قالت جيهان الشماشرجي: الكواليس كانت لذيدة جدا والأطفال كانوا عاملين جو رهيب وروح حلوة، وإحنا كتيم كلنا كنا فاهمين بعض وطول الوقت بنضحك، وده اللوكيشن الوحيد اللي عمري ما شفت فيه شد أو المخرج بيزعق، وخالد الحلفاوي عنده صبر رهيب، وكنت بقوله لو أنا قاعدة مع كم العيال دي ممكن أشد شعري لكن هو بيتعامل براحة وبيسايس الأطفال خاصة أنه أب وفاهم سيكولوجية الأطفال.
وكشفت جيهان الشماشرجي أنها لا تفهم في التكنولوجيا والتعامل مع مواقع التواصل الاجتماعي، قائلة: لينا وجيسكا كانوا دايمًا في الكواليس بيعملوا تيك توك، وأنا معرفش إيه التيك توك وكل اللي أعرفه أني بجيب الفيديو اللي منزلاه على إنستجرام أنزله على التيك توك، ومعرفش ايه سناب شات مثلا، وكتير حاولوا يشرحولي لكن حاسة إني كبرت أو مش بحب التكنولوجيا وهما شاطرين أوي في الموضوع ده.
وأكدت جيهان الشماشرجي أنها تتلقى تعليقات كثيرة وتفاعل من قبل السيدات على أدوارها، كما يسألونها دوما عن روتين شعرها، قائلة: بستحمي وبسرحه وبغسله لكن مفيش ورتين.. وبتبسط بتفاعل الستات.. بحس أنهم بيعاملوني كأني واحدة منهم.
وعلى جانب آخر، كشفت جيهان الشماشرجي كواليس مشاركتها في مسلسل سفاج الجيزة، قائلة: اعرف فهمي من 15 سنة وأول مرة نشتغل مع بعض، وقعدنا نتكلم ونحضر وبالنسبة لي كممثلة ما ينفعش أحكم على الشخصية أنها شريرة لأن لو حد شرير جواه بيكون عنده مبررات لأي حاجة بيعملها وشغلتي إني اتعاطف مع الشخصية وادي ليها مبرررات، وفكرت ليه عاوزة تقتل جوزها وعدت بإيه والراجل عملها إيه حتى لو مش مقنع لأي بني آدم، وأنا بصور كنت عارفة إني هتكره واتشتم واتفاجئت أن الناس اتعاطفت مع الشخصية.
