باسم يوسف يكشف أسباب إغلاق حساباته: التهديدات دفعتني لإلغاء عدة ارتباطات
كشف الإعلامي باسم يوسف، عن أسباب إغلاق حساباته على مواقع التواصل الاجتماعي، قائلا إن تهديدات وشكوك حول اختراقها، مؤكدا أن جميع حساباته عادت بشكل طبيعي حاليا.
وقال باسم يوسف في منشور عبر حسابه على موقع إكس مساء اليوم الثلاثاء: من كام يوم اضطريت لقفل الحساب على منصة إكس لسببين: جاتلي رسايل مش لطيفة تتعلق بالسلامة، كمان كان فيه شك إن فيه محاولات اختراق، قفلت الحساب للتأكد من جدية الحاجتين دول، وكمان أشوف إذا كان ليهم علاقة ببعض.
وأضاف: أنا عادة مش باخد حاجة زي دي بجدية زيادة عن اللزوم لما تبقى ليها علاقة بيا أنا، لكن لو له علاقة بحد تاني كان لازم أكون حريص أكتر، قفلت الحساب ونشرت بيان كما هو موضح في الصورة.
باسم يوسف: تعرضت لضغط نفسي وعصبي وصحي أنا وعائلتي
وواصل: بعد يومين انتشرت شائعات كتيرة عن سبب الحجب. البيان كان مش واضح وأثار لغط كتير، نزلت بيان تاني على كل المنصات الأخرى -الصورة التانية- عشان ما يحصلش اتهام لحد من غير لازمة وقلت إني حنزل فيديوهات على باقي المنصات ما عدا إكس وكنت في موقف مقدرش أشرح أكتر من كده.
وأكمل: بصراحة بعد كده ولا نزلت على إكس ولا غيره، صحيح الموضوع أخد كام يوم بس للتأكد من عدم وجود مشاكل لناس تانية عشان نعالج موضوع الاختراق والتأمين، بس بصراحة الموضوع عك شوية وكان في ضغط نفسي وعصبي وصحي عليا وعلى عيلتي، فبصراحة الواحد أعصابه اتحرقت، وكان لازم فعلا أبعد عن السوشيال ميديا، وكان لازم التركيز والأولوية تجاه عيلتي وده خلاني ألغي بعض الارتباطات اللي كنت متفق عليها الأسبوع اللي فات، منها عروض كنت متفق عليها من زمان وكمان بطلت أعلن عن العروض القادمة اللي في أمريكا وكل ده خسارة مادية كبيرة، لكن أنا فعلا ما كنتش قادر.
وتابع حديثه عبر إكس: أنا حرفيا بعدت عن السوشيال ميديا 7 أيام فقط. 7 أيام لا غير ومع ذلك طلع كلام كتير وتكهنات وإشاعات غريبة عشان كده بكتب التوضيح ده.
واختتم: الخلاصة، أنا رجعت على كل الحسابات ومكمل عادي في عمل فيديوهات ومقاطع من الحوارات اللي بعملها كالعادة، بس كمان هحاول أعمل فيديوهات أناقش فيها بشكل أعمق المعلومات والكلام اللي بقوله في الحوارات دي، لأن ساعات مساحة الحوار مش بتديني فرصة أقول كل اللي عايزه والفيديوهات هتنزل على كل المنصات بما فيها منصة إكس باللغة العربية والإنجليزية وأولهم فيديو نازل في خلال 48 ساعة كنت بشتغل عليه قبل التوقف ورجعتله تاني امبارح. الفيديو بياخد وقت شوية لأني بجرب ستايل مختلف في المونتاج فمعلش بياخد وقت أطول أنه يخلص، أتمنى أسمع آرائكم.
