ارتشاح على الرئة والقلب| طبيب يحذر بلوجر من الإعلان عن دواء غير مرخص للتخسيس.. والأخيرة: روح ذاكرلك كلمتين
نشر أحد الصيادلة على صفحته الشخصية بمنصة تيك توك، مقطع فيديو يتهم فيه إحدى البلوجرز بالتضليل وتعريض صحة متابعيها للخطر، بعد نشرها إعلانا لدواء تخسيس يدعى الترا جرين كوفي، عبارة عن كبسولات وقطرات، يزعم أنها تحتوي على مادة فعالة تدعى سيبوترامين، والتي تم سحب تداولها في عديد من الدول.
طبيب يحذر بلوجر من الإعلان عن دواء غير مرخص للتخسيس
وتصدرت البلوجر التي تدعى شيرين التريند مؤخرا باسم أم دودو، بسبب أغنية أطفال اعتبرها الكثيرون غير لائقة، وظهرت في الفيديو المزعوم، تشير إلى مميزات الدواء الذي ساعدها في فقدان 15 كيلو خلال شهر ونصف، لأن الكبسولات تزيد من معدل الحرق، وتعمل على سد الشهية.
وعبر الطبيب عن استيائه من رفض البلوجر أن تعترف بخطئها، فيقول: كتبتلها تتأكد إن الدوا ده مرخص لأني متأكد أنه مش مرخص، ومتأكد انه محدش يعرف عنه حاجة، وبيتصنع تحت بير سلم وبيتقال عليه مستورد، والدوا ده مبيناسبش كل الناس وخطير جدا، حبيت أقولها المعلومة بصيغة سؤال عشان متتحرجش.
لترد قائلة: اقسم بالله إنت ما بتفهم حاجة وأنا مش همسح كومنتاتك عشان أنا واثقة من نفسي ومن اللي بعمله، روح ذاكرلك كلمتين.
البلوجر تعلن عن كبسولات غير مرخصة للتخسيس
وأشار الطبيب إلى أن البلوجر نشرت صورة ورقة تزعم أنها الترخيص الخاص بالدواء، ولكن في الحقيقة الترخيص لكريم بشرة يدعى evanesce firming skin cream، ليرد عليها قائلا: البلوجر عملتلي بلوك وقالتلي مش هشهرك على قفايا، احترمي الناس اللي شهروكي وخافي على صحتهم.
ثم أضاف: الترخيص بيبقى فيه اسم المنتج والمادة الفعالة وشكل المنتج ورقم الترخيص وتاريخه، وكل منتج اتكلمتي عنه ليه ترخيص لوحده، الكبسولات ليها ترخيص والنقط ليها ترخيص، عشان الخطوة الجاية هنطلع على هيئة الدواء المصرية نكتب اسم الشركة والمنتج والمادة الفعالة ونعمل بحث لو ظهر يبقى مرخص، لو واثقة من نفسك نزلي التراخيص، بلاش مكابرة في صحة الناس.
واختتم حديثه قائلا: الكبسولات الي بتروج ليها فعلا بتزود الحرق وبتقلل الشهية، لحد هنا مكنش هيبقى فيه أي مشكلة، لكن للأسف المادة السيبوترامين بتعمل كوارث في الصحة، بتزود معدل ضربات القلب وبتعمل ارتفاع في ضغط الدم شديد جدا، بتعمل ارتشاح على الرئة وعضلة القلب، وبتوصل لسكتات دماغية، وبتعمل فشل كلوي وبتزود انزيمات الكبد، كل ده ممكن يحصل دون ظهور أعراض، وللأسف المادة دي بيتم تهريبها، ومنتشرة في مراكز الأغذية اللي في الأرياف والمناطق الشعبية.
