استلهمها من مرض جدته.. طبيب أسنان يبتكر عيادة متنقلة بصناعة مصرية لمساعدة كبار السن وذوي الهمم
بصناعة مصرية خالصة تمكن دكتور عبد الرحمن من إنشاء عيادة أسنان متنقلة للزيارات المنزلية لكبار السن وذوي الاحتياجات الخاصة، حيث كانت مساعدة جدته دافع له لتنفيذ تلك الفكرة.
عيادة أسنان متنقلة
في فيديو على منصة تيك توك ظهر دكتور عبد الرحمن يدفع حقيبة ولكنها ليست حقيبة عادية، فعند فتح تلك الحقيبة، نخرج منها عيادة أسنان كاملة بداية من كرسي الطبيب المعالج إلى سرير المريض بمعداته كاملة.
وشرح دكتور عبد الرحمن لـ القاهرة 24، تفاصيل فكرته موضح: هي أول مرة تتعمل في مصر، وكل المعدات معمولة بصناعة مصرية مفيش أي حاجة من برا.
وأشار دكتور عبد الرحمن: الفكرة مستهدفة كبار السن وذوي الهمم، بس في الناس كتير بقت تكسل وحبت الفكرة ديه خاصة إني بتعامل بأسعار عادية مش باخد أي رسوم إضافية على الكشف والأسعار مناسبة لكل الفئات.
مساعدة كبار السن وذوي الهمم
كبار السن في مصر فئة كبيرة جدا تتخطى 10 ملايين شخص، من بينهم عدد كبير يستخدم الكراسي المتحركة للتنقل، فكان هذا دافع لتنفيذ فكرة الزيارات المنزلية لعلاج الأسنان.
أوضح دكتور عبد الرحمن: الفكرة مستهدفة كبار السن علشان نسبتهم كبيرة جدا، وأنا اشتغلت في عيادات كتير وكان علشان يجيلنا حد من ذوي الاحتياجات الخاصة كانت حاجة صعبة، لأنه بيجي منقول في إسعاف، وتخدير كلي، فأنا بوفر على الناس دي التعب ده كله برحلوا لحد البيت ومعايا الكرسي بتاعي زي ما موجود في العيادة وكل الأجهزة اللي موجودة في العيادة موجودة معايا، الكرسي والحوض وكل المعدات.
عاش دكتور عبد الرحمن في طفولته فترة كبيرة مع مرض جدته والتي عانت خلاله من ألم شديد في أسنانها ولنقلها إلى العيادة لتلقي العلاج كانت بحاجة إلى سيارة إسعاف.
وأردف الدكتور عبد الرحمن: عشت تجربة شخصية مع وجع الأسنان مع كبار السن، طفولتي كانت مع جدتي وكانت علشان نوديها لدكتور أسنان بنجهز قبلها بأسبوع وبنكلم سيارة إسعاف وبيبقى تعب كبير.
النموذج صناعة مصرية خالصة والأول من نوعه
وأضاف دكتور عبد الرحمن: النموذج ده موجود في السويد وأمريكا هما بيطبقوا الزيارات المنزلية، بس أنا جبت نفس الديزاين وعملت كل حاجة في مصر وضيفت عليه تحديث وهو الكرسي والحوض واللايت، أنا عامل المعدات كلها بصناعة مصرية كاملة.
وواصل: كان تعب جدتي خبرة ليا، علشان جدتي كانت في أخر فترة ليها بتستخدم الكرسي المتحرك، فأنا عارف تفاصيل كتير لما كنت بصلحه واشتريه وعارف ازاي ممكن يتفرد.
