محمود سعد عن واقعة محمد فؤاد وطبيب عين شمس: لا أٌدين أحد.. ولازم نعالج مشاكل الطوارئ المهولة
علق الإعلامي محمود سعد، على واقعة الفنان محمد فؤاد وطبيب مستشفى عين شمس التخصصي، مؤكدًا أنه يجب الأخذ بالمواقف البارزة لحل مشكلة الطوارئ بالمستشفيات.
وقال محمود سعد، في مقطع فيديو عبر قناته الخاصة بموقع يوتيوب: واقعة محمد فؤاد أنا ممكن أفتي فيها للصبح وأدين أطراف، ولكن الشعب المصري عنده احتكاك حقيقي بالطوارئ في معظم المستشفيات، بصرف النظر عن مين المدان وأنا معرفش إيه اللي حصل، وأنا ممكن أفتي وأدين محمد فؤاد وأُناصر الأطباء، ولكن محدش يعرف اللي حصل بالظبط، واحد داخل بـ أخوه عنده جلطة ومتوتر وحصلت المشكلة، ولكن لازم ناخد المواقف البارزة ونعالج بيها المشاكل اللي موجودة.
وأضاف محمود سعد: في مشاكل في الطوارئ مهولة ولا أدين أحد إطلاقًا، إنما مستشفيات اللي فيها طوارئ وخاصة منيرة والقصر العيني وغيرهم، فيها مشاكل كتير، والطوارئ عايزة نظرة كبيرة أنها تبقى منظمة لأن الدكاترة بيتبهدلوا هما والممرضين، دي مسألة عايزة نظرة حقيقية، الطوارئ دي للحالات الحرجة والخطر، لا بد أن يكون فيها إمكانيات طبية وإسعافات حقيقية، ودخول وخروج كريم للمريض واحترام للدكتور والممرضين.
وأوضح: في مشكلة كبيرة جدًا في منتهى الحساسية، لأن غالبًا المريض بيروح وهو عنده أزمة، محدش بيروح الطوارئ يقص أظافره، وليه أهالي المريض بتوصل لأوضة الكشف؟ المفروض يسيبوا المريض في الطوارئ وميقفوش على رأس الدكتور.
وواصل محمود سعد: أنا مش عارف الحل إيه، ولكن في متخصصين يقولوا يتعمل إيه، وده بصرف النظر عن قضية محمد فؤاد والدكتور، ولكن المشكلة قائمة، ومشكلة محمد فؤاد دي هتخلص على ولا حاجة، والناس برا مصر لما حد يقولهم مينفعش يدخلوا الطوارئ مع المريض بيسكتوا، لكن هنا بيبقوا عايزين يكسروا الباب ويدخلوا، الدكتور لما تشغله في عز زحمة في دوشة وهو معندهوش إمكانيات ولا معدات دي حاجة مش معقولة.
واختتم محمود سعد: لو كتبتوا خناقات الطوارئ هتلاقوا كتير زي خناقات محمد فؤاد كل يوم، ولكن اللي اتخانق معاهم مش محمد فؤاد.
واقعة محمد فؤاد وطبيب مستشفى عين شمس
وكان الفنان محمد فؤاد قد بادر أمس، بالصلح في أزمة التعدي على طبيب مستشفى عين شمس التخصصي، وأكد أن الطبيب أخ عزيز ومثل نجله وشقيقه الصغير، مطالبًا جمهوره بعدم الانجراف وراء السوشيال ميديا وما يكتب فيها.
