مؤلف سفاح التجمع بطولة الفيشاوي: سجلنا المسلسل في الرقابة.. والشركة أنذرت من يدعي إنتاج نفس العمل
تحدث جوزيف فوزي مؤلف مسلسل سفاح التجمع للمنتج أيمن يوسف، عن سبب وجود عملين مطروحين بنفس الاسم، وذلك على خلفية إعلان محمد صلاح العزب والمنتج أحمد السبكي والمنتج أيمن يوسف، إنتاج عملين يحملان الاسم ذاته.
جوزيف فوزي: محدش بيعلن عن ورق
وقال جوزيف فوزي في تصريحات لـ القاهرة 24، إنه اتفق مع المنتج أيمن يوسف على إنتاج مسلسل سفاح التجمع وحصلا على الترخيص وجرى تسجيل العمل، مستكملًا: أي عمل لما بيكون فيه سيناريو وشركة إنتاج وداخلين مجال التنفيذ بيتم الإعلان، إنما محدش بيعلن عن ورق.
وأضاف: واقعة سفاح التجمع موضوع مهم بالنسبة للناس وأكيد فيه مؤلفين كتير وشركات عاوزين يعملوه، لأنه قضية مطروحة ولافتة للنظر.
معانا ترخيص من الرقابة وأعلنا بالمستندات
وواصل جوزيف فوزي: المنتج قال هنستنى على الإعلان لما يكون معانا نجم وكده كده مرخصين الورق في الرقابة والاسم بتاعنا، والحدوتة أصبحت ملك المؤلف، لقصة سفاح بيقتل في منطقة التجمع.
واستطرد مؤلف العمل: أول ما لقينا حد بيدعي إنه بيعمل سفاح التجمع أعلنا بالمستندات، ومفيش واحد طلع صورة ترخيص لأن الرقابة مستحيل ترخص الاسم مرتين، علشان كده أنا حاطط الغلاف بتاع قصة سفاح التجمع بتاريخ ترخيصه، وهما عندهم تصميم بشكل كبير على تقديم المسلسل وده مينفعش لا مهنيا ولا أخلاقيا.
جوزيف: الشركة تعاملت رسمي وبعتت إنذارات
وأردف: لما راحوا يسجلوا الاسم منفعش لأن الاسم متسجل في الرقابة ومينفعش يسجلوا باسم متكرر، وشركة الإنتاج تعاملت رسمي وبعتت إنذارات رسمي إن العمل مترخص من البداية ومينفعش ولا يجوز ترخيص عمل تاني بنفس الاسم
وأوضح جوزيف فوزي، أنه جرى التوقيع مع الفنان أحمد الفيشاوي للعب دور البطولة في العمل، مضيفًا: اللي عاوز يقدم العمل يقدمه باسم تاني وحدوتة مختلفة، أما كلمة سفاح التجمع مينفعش خالص.
واستطرد فوزي: في الأول والآخر السوق كبيرة وربنا يكرم كل الناس، 20% كانوا عاوزين يعملوا سفاح التجمع، ومحدش بيتكلم علشان عرفوا إن فيه عمل بيتعمل، و99% من المنتجين محدش قال إنه هيعمل المسلسل وإحنا كنا عمليين بالتعاقد مع بطل العمل.
مؤلف سفاح التجمع: جار التعاقد مع باقي الأبطال.. ومن المرجح تصوير العمل نهاية أكتوبر
وعن تفاصيل المسلسل قال: فترة تحضير ما زلت شغالة على الورق وباقي تفاصيل قليلة، وبعد الفيشاوي هيكون الإيقاع سريع، وممكن نبدأ تصوير في نهاية شهر أكتوبر وحاليًا جار التعاقد مع باقي الأبطال.
