سبب وفاة نجل محمود طاهر رئيس الأهلي السابق بعمر 34 عاما
كشف الدكتور جمال شعبان مدير معهد القلب السابق، سبب وفاة حسن محمود طاهر نجل رئيس الأهلي السابق، والذي وافته المنية مساء أمس الجمعة، عن عمر ناهز الـ34 عاما.
سبب وفاة نجل محمود طاهر
كتب الدكتور جمال شعبان عبر حسابه الشخصي على فيسبوك: ما زالت السكتة القلبية تغتال الشباب، عزائي للسيد محمود طاهر رئيس النادي الأهلي السابق في وفاة ابنه حسن، بأزمة قلبية مفاجئة.
وأوضح شعبان أسباب الأزمة القلبية المفاجئة، حيث كتب: إيه اللي يخلي شاب صغير تجي له جلطة ويموت فجأة، وإزاي واحد يبقى في العشرينيات تجيله جلطة في شرايين المخ أو شرايين القلب.
وأردف: الجلطة يعني كتلة من خلايا الدم بتتجمع وتلزق في بعضها، وتلزق في جدار الشريان وتقفله، فالدم اللي وظيفته يجري في الشريان ويروح الخلايا يتوقف والخلايا اللي مش واصل لها الدم، تتوقف عن العمل وقد تتلف وتموت.
وواصل: نوعين من الخلايا لما بيموتوا مفيش خلايا تانية تنمو مكانهم المخ والقلب، ولو الجلطة كبيرة وفيه شريان كبير بيغذي مساحة كبيرة، من المخ ممكن تحصل سكتة دماغية يتوقف المخ عن العمل، وربما تحدث الوفاة والكلام نفسه ينطبق علي السكتة القلبية.
وأكمل جمال شعبان: لما شريان القلب الكبير، تتكون جواه جلطة وينسد انسدادًَا كليًا مساحة كبيرة من القلب تتلف وتموت، وممكن القلب يتوقف.
وأوضح: إيه اللي يخلي شاب صغير تجيله جلطة؟، التدخين - المسكنات - مشروبات الطاقة والمنشطات - المخدرات - تاريخ وراثي بارتفاع الكولسترول والدهون وقابلية التجلط وكورونا.
واختتم جمال شعبان: طبعًا الوقت الذهبي الدقايق أو الساعات الأولى قد تنقذ حياة الشخص لو تم التدخل بالقسطرة أو الأدوية التي تذيب الجلطة الكلام دا ينطبق علي المخ والقلب.
