محمود الليثي: مراتي مبتغيرش عليا.. ومفيش راجل يقدر يعدل بين 2 ستات
تحدث المطرب الشعبي محمود الليثي، عن زوجته وشقيقها الراحل، والذي أكد أن له فضل عليه في بداية مشواره الفني، بجانب الكشف عن رأيه في تعدد الزوجات.
وقال محمود الليثي، في حواره مع الإعلامية هبة الأباصيري، في مهرجان العلمين: مراتي مبتغيرش عليا، وهي عارفة إني بحافظ عليها، بس بتقولي خلي بالك فلانة بتبصلك وأنا بحط حدود على طول، ومراتي هي النعمة في حياتي ووش السعد عليا وشُفت الخير كله معاها، أنا بحبها وبخاف عليها جدًا.
وتابع محمود الليثي: هي بنت ناس جامدين أوي في السيدة، وأخوها الله يرحمه كان عمري ووش السعد والهنا وخيره عليا ليوم الدين، وأنا مسمي ابني على اسمه.
أما عن رأيه في تعدد الزوجات، فعلق محمود الليثي: أنا مش مقتنع إن قلب الراجل يسيع أكتر من ست واحدة، أنت ترضى تنيم اللي حبيتك زعلانة ومقهورة؟ أنا عندي عقدة نفسية من الحكاية دي، مفيش راجل يقدر يعدل بين 2 ستات، هتقول لكل واحدة فيهم بحبك إزاي، هتكذب مرتين؟.
محمود الليثي: دفنة أمي كان فيها 1500 عربية
كما أعرب محمود الليثي، عن امتنانه الكبير لجميع من سانده في وفاة والدته، قائلًا: بعد اللي أنا شُفته من الناس في عزاء أمي، أنا جالي ناس قيمة وقامة مهندسين ودكاترة ومعلمين وأنا مكنتش مصدق أن ده عزا، حتى في الدفنة كانت أكتر من 1500 عربية، وروحت عملت حج لـ أمي وأول ما رجعت قولتلهم أنا لو بطلت الشغلانة دي كفاية عليا حب الناس اللي أنا شُفته.
