كريم عبد العزيز: الشعب اللي بيصرف علينا.. وبحب عصر ما قبل التكنولوجيا وأنا أهلاوي حتى النخاع
حل الفنان كريم عبد العزيز، ضيفًا على الإعلامي إبراهيم عبد الجواد، في مهرجان العلمين، وتحدث خلال اللقاء عن تفاصيل مشواره الفني، وعلاقته بالفنان ماجد الكدواني، وكشف عن أمنيته في عيد ميلاده الذي سيحل الأسبوع المقبل.
أبرز تصريحات كريم عبد العزيز في مهرجان العلمين
- أنا كنت مراعي أمي ودي دعواتها ليا الله يرحمها، وأنا راجل في حالي بشتغل وبروح وخلاص.
- قبل ما أطلع المسرح بدقائق في مهرجان العلمين لعرض مسرحية سندباد، قولتلهم هو أنا لو مشيت عادي؟، المسرح أبو الفنون وله طبيعة خاصة غير السينما والتلفزيون، أنت واجهة مباشرة مع الجمهور.
- لو بتعرض مسرحية 100 يوم الخوف هيكون موجود كل يوم، بس الحمد لله والجمهور شرفنا ونورنا.
- أنا فرحان جدًا أني بعرض في بلدي وبمهرجان العلمين للسنة الثانية، المهرجان كل سنة بيتطور عن السنة اللي قبلها في كل حاجة سواء تجهيزات المهرجان والمسارح والجرافيك.
- سعيد جدًا بالتعاون اللي حصل بين المهرجان وموسم الرياض، ده بيصب في مصلحة المشاهد في الآخر كلنا بنقدم فن للعرب.
- الجمهور أذكى من ما أي إنسان يتخيل، ودايمًا بنقول الشاشة والمسرح فضاح، اللي في قلبك بيطلع وأنا راجل في حالي وبشتغل وبروح وبس.
- أنا أساسًا دارس إخراج، ومتربي في بيت والدي المخرج الأستاذ محمد عبد العزيز، فأنا مولود في بيت فيه سينما وعارف أهمية السينما ودورها ورسالتها والفن بشكل عام، وزي ما تقول اتعلمت على قد ما أقدر وخدت تطعيم.
- قبل ما أطلع على المسرح بقول فوضت أمري إلى الله إن الله بصير بالعباد.. وربِ أشرح لي صدري.
- وبقول وِرد كنت حافظه من علاء ولي الدين، بيقول اللهم صلي وسلم على سيدنا محمد صلاة عبد قلة حيلته ورسول الله وسيلته وأنت لها يا إلهي ولكل كرب عظيم، ففرج عنا ما نحن فيه بسر أسرار بسم الله الرحمن الرحيم.
- كنا بنحضر حاجة في التلفزيون مع حبيبي وأخويا أستاذ حسام شوقي الله يرحمه، وأستاذ فتحي إسماعيل الله يرحمه، ولكن أجلناه للسنة اللي جاية بحكم الظروف.
- داخل فيلم مع دكتور بيتر ميمي حبيبي وأخويا، هنصوره في أول أسبوع في شهر 9 إن شاء الله.
- أنا لعبت 4 سنين في ناشئين الأهلي، واتدربت مع كابتن صفوت عبد الحليم، وأنا أهلاوي حتى النخاع وإحنا عائلة مجنونة بالأهلي، مع احترامي للزمالك، وأنا بحب شيكابالا من الكورة في مصر، بحب زيزو وعمر جابر جدًا وكابتن حسن شحاته.
- نيللي كريم من أجمل وأنضف الشخصيات اللي ممكن تشوفها في حياتك، وهي واضحة ومبتعرفش تلف وتدور واللي في قلبها على لسانها.
- اشتغلنا أنا ونيللي كريم مع بعض قبل كده في الفيل الأزرق 1و2، وعملنا إعلانات مع بعض ومسرحية السندباد خامس عمل يجمعني بيها وأنا بحب الشغل مع نيللي كريم.
- الكيمياء بيني وبين ماجد الكدواني رباني، وهو مش صاحبي هو أخويا وعشرة سنين، ربنا بعتهولي من السماء، 24 سنة إخوات وربنا يديمها نعمة، أنا نفسي أعمل مسرح مع ماجد الكدواني لو يرضى.
- بتمنى في سنتي الجديدة الصحة والستر وأن ولادي وزوجتي يبقوا في أحسن صحة وأحسن حال، وأن على قد ما أقدر ربنا يديني القدرة أن أفضل محافظ على حب وتقدير هذا الجمهور العظيم اللي إحنا شغالين علشانه.
- أنا هقول زي الأستاذ الكبير أبونا عادل إمام اللي بيصرف علينا هو الشعب المصري، ويارب دايمًا أبقى عند حسن ظنكم.
- أعتقد أن هيبقى فيه حاجة لشخصية سلطان الغول اللي جسدتها في ولاد رزق 3.
- أنا بحب الخمسينات والسيتينات جدًا والعصر قبل جنون التكنولوجيا، أنا مش مجنون السوشيال ميديا مع أنها مهمة ولا بفهمها، ومعرفش يعني إيه منشن وتاج.
