أحمد شاكر عبد اللطيف: أي مشروع جمب الفن خسران.. وأعظم استثمار للفنان في نفسه
كشف الفنان أحمد شاكر عبد اللطيف، عن سبب ابتعاده عن التمثيل منذ عام 2021، مشيرًا إلى أنه يختار أدواره بعناية، مؤكدًا أن جيله ما زال لديه طاقة ولياقة فنية وموهبة.
وقال أحمد شاكر عبد اللطيف: أنا معجب بجيل الشباب جدًا وأتمنى يكون كل الناس موجودة وفيه ناس من جيلي لسه عندها طاقة ولياقة فنية وموهبة وتقدر تشتغل، وأتمنى مع هذا التجديد اللي لمسينه في مجال الإعلام والأداء الرائع للشركة المتحدة يكون لنا نصيب في أعمال كتير جاية ونفضل نمتع الجمهور المصري.
أحمد شاكر: كان بيتراهن عليا في أدوار صعبة ومهمة
وأضاف أحمد شاكر عبد اللطيف: أنا الحمد لله لما مشيت مشوار من سن صغير وكان بيتراهن عليا في أدوار صعبة ومهمة وقدمت خطوات سعيد بيها جدا وهذه المسلسلات تعاد حتى الآن، مثل أم كلثوم وأسمهان والمال والبنون اللي قدمت فيه دور الظابط ابن الصول، ولما الممثل بدايته بتلاقي قبول عند الناس بيكون عاوز يحافظ عليها ومش سهل عليه يختار أي عمل، وأنا بحب أقدم كل الألوان وده ظهر في مسلسل الاختيار لأني قدمت دور شرير بعيد عن الأدوار اللي قدمتها، وبحب التنوع وأي دور هيعرض عليا هحس أن فيه تمثيل هكون حابب أني أعمله.
أحمد شاكر: مفيش أحلى من إمتاع الجمهور
وبشأن تفكيره في مشروع آخر بجانب الفن، قال أحمد شاكر عبد اللطيف: إحنا كفنانين بدأنا نفكر نعمل حاجات جمب التمثيل لكن مهما الواحد ينجح في أي مجال مفيش أحلى من إمتاع الجمهور وإن الناس تبدي إعجابها بأعمالنا، ودي حاجة بتفرحنا بجد وبتحسسنا إننا قريبين من الناس وبنعمل حاجة كل الناس بتقيمها، كفاية أن الممثل بيشتغل شغلانة العالم كله بيقيمها وأي حد بيشوفه بيقدر يقوله رأيه، فلما بتكون حاجة حلوة والناس بتتبسط إحنا بنفرح أوي.
أحمد شاكر: أعظم استثمار ممكن يعمله الفنان إنه يستثمر في نفسه
واستطرد أحمد شاكر عبد اللطيف: فيه فنانين بيفكروا في مجالات تانية ولكن أنا شايف أن أعظم استثمار ممكن يعمله الفنان أنه يستثمر في نفسه، لأن هو نفسه مؤسسة فنية ويدير نفسه صح ويلعب رياضة وينام كويس ويبعد عن أي حاجة ممكن تؤذي صحته، وفي الآخر لما بيحافظ على نفسه بيطول عمره الفني والناس لما بتتفرج عليه بتعتبره قدوة إيجابية وبتسعد لما تشوفه في حالة كويسة وأي مشروع جمب الفن، الفن هو اللي يكسب.
أحمد شاكر: الفنان لازم ياخد باله من صحته ويلعب رياضة
وبشأن طقوسه لكي يحافظ على لياقته قال: المفروض الواحد ما يشلش حاجة في قلبه تجاه حد وياخد الدنيا ببساطة، لأن الحياة رحلة سريعة لو الواحد عاشها في أنه يؤثر في حياة اللي حواليه بشكل إيجابي هيضيف له رونق ومحبة، ما بالك لو بيشتغل في الفن ضروري ياخد باله من صحته ويلعب رياضة ويقرأ ويحاول يسمع الناس ويقرب لهم، وقرب الفنان من الناس وتواضعه واستماعه لهم بيطول عمره الفني.
